Memlekettik qyzmetshilerdiń ant berý mátini jetildiriledi
ASTANA. KAZINFORM – 2024 jyly elimiz boıynsha 15 myńnan asa memlekettik qyzmetshi túrli tártiptik jaýaptylyqqa tartyldy. Bul týraly Memlekettik qyzmet isteri agenttiginde 2024 jyldyń jumys qorytyndysy boıynsha ótken alqa otyrysynda agenttik tóraǵasy Darhan Jazyqbaı málim etti.
- Memlekettik qyzmetshilerdiń antqa adal bolýy negizgi ustanymǵa aınalýy tıis. Árbir memlekettik qyzmetshi ant qabyldaǵanda adal, ádil jáne óz mindetterin minsiz oryndaýǵa ýáde beredi. Ant qoǵam aldyndaǵy jeke mindetteme men jaýapkershiliktiń kórinisi. Ol qoǵamǵa qyzmet etý, el múddelerin qorǵaý jáne joǵary moraldyq qundylyqqa sáıkes áreket etý mindetin júkteıdi. Osyǵan oraı memlekettik qyzmetshilerdiń ant mátini men ant berý rásimderin jetildirý boıynsha tıisti jumystar júrgizilýi kerek, - dedi agenttik tóraǵasy.
Alqa otyrysynda memlekettik qyzmet salasyn baqylaý jumysynda aldyn alý sharalaryna, azamattar men memlekettik qyzmetshilerdiń quqyǵyn qorǵaýǵa basa nazar aýdarylatyny aıtyldy. 2024 jyly agenttik jáne aýmaqtyq departamentter memlekettik qyzmet salasyndaǵy zańnamanyń saqtalýyna baılanysty tekseris nátıjesinde 15 myńnan asa talapty buzý jaǵdaıyn anyqtady.
- Zańsyz qabyldanǵan 100-ge jýyq akti men sheshimniń kúshi joıylyp, 760 azamattyń quqyqtary qalpyna keltirildi. Jalpy, 2024 jyly elimiz boıynsha 15 myńnan asa memlekettik qyzmetshi túrli tártiptik jaýaptylyqqa tartylǵan. Qyzmettik ádep normalaryn saqtamaǵany úshin 310, al memlekettik qyzmetke kir keltiretin áreket jasaǵany úshin 165 qyzmetshi tártiptik jaýapqa tartyldy, - dedi Darhan Jazyqbaı.
Agenttik bastamasymen jazanyń bultartpaýshylyq prıntsıpin dáıekti túrde júzege asyrý mehanızmderi aıqyndaldy. Osy jyldan bastap memlekettik qyzmetshilerdiń basqa memlekettik organǵa aýysýyna qaramastan, burynǵy laýazymda jasaǵan teris qylyqtar úshin jaýaptylyqtan bosatylmaıdy.
Budan bólek, memlekettik qyzmetshiler arasynda zańnamalardyń buzylýyn aldyn alýda Ádep jónindegi ýákilder ınstıtýty mańyzdy ról atqarady. 2024 jyly Ádep jónindegi ýákilder azamattar men memlekettik qyzmetshilerge 28 myńnan astam konsýltatıvtik kómek kórsetti.
Jaqynda Úkimettiń keńeıtilgen otyrysynda Prezıdent Qasym-Jomart Toqaev otanshyl kadrlar basshylyq laýazymdarǵa taǵaıyndalatynyn aıtty.