Memlekettik qyzmetshilerdi jaýapkershilikke tartý tártibi ózgerdi

ASTANA. KAZINFORM — 2025 jylǵy 2 mamyrdaǵy Prezıdent Jarlyǵymen memlekettik qyzmetshilerge tártiptik jaza qoldaný qaǵıdalaryna ózgerister engizildi.

Saıası memlekettik qyzmetshi aldyńǵy memlekettik laýazymynda tártip buzǵany úshin jaýapkershilikke tartylady.

Eger aldyńǵy laýazym saıası memlekettik laýazym bolsa, onda tártiptik jaýapkershilik máselesin qaraý tártiptik teris qylyq jasalǵan kezde qyzmet atqarǵan memlekettik organda júrgiziledi jáne bul rette saıası memlekettik qyzmetshilerge qatysty qaǵıdalardyń tıisti erejeleri qoldanylady.

Eger aldyńǵy laýazym ákimshilik memlekettik laýazym bolsa, onda tártiptik jaýapkershilik máselesin qaraý teris qylyq jasalǵan kezde qyzmet atqarǵan memlekettik organda júrgiziledi jáne bul rette ákimshilik memlekettik qyzmetshilerge qatysty qaǵıdalardyń tıisti erejeleri qoldanylady.

Saıası memlekettik qyzmetshige tártiptik jaza sońǵy atqarǵan laýazymy boıynsha ýákiletti tulǵa tarapynan tártiptik jaza qoldaný merzimderi sheginde salynady.

Saıası memlekettik laýazymdaǵy ókilettigi toqtatylǵan kúnge deıin alynbaǵan tártiptik jaza ókilettigi toqtatylǵan kúnnen bastap alynǵan dep esepteledi.

Sondaı-aq ákimshilik memlekettik qyzmetshilerdi tártiptik jaýapkershilikke tartý qaǵıdasy da ózgertildi. Ákimshilik memlekettik qyzmetshi aldyńǵy memlekettik laýazymda teris qylyq jasaǵany úshin tártiptik jaýapkershilikke tartylady.

Eger aldyńǵy laýazym saıası memlekettik laýazym bolsa, tártiptik jaýapkershilik máselesin qaraý teris qylyq jasalǵan kezde qyzmet atqarǵan memlekettik organda júrgiziledi jáne bul rette saıası memlekettik qyzmetshilerge qatysty qaǵıdalardyń tıisti erejeleri qoldanylady.

Eger aldyńǵy laýazym ákimshilik memlekettik laýazym bolsa, tártiptik jaýapkershilik máselesin qaraý teris qylyq jasalǵan kezde qyzmet atqarǵan memlekettik organda júrgiziledi jáne bul rette ákimshilik memlekettik qyzmetshilerge qatysty qaǵıdalardyń tıisti erejeleri qoldanylady.

Ákimshilik memlekettik qyzmetshiniń ýákiletti tulǵasy:

— qyzmettik tergeýdi toqtatý nemese qaıta bastaýǵa negiz materıaldar men málimetterdi ýaqtyly usynady;
— memlekettik qyzmetshini tártiptik jaýapkershilikke tartý máselesin jan-jaqty jáne obektıvti qaraýǵa ózge de járdem kórsetedi.

Ákimshilik memlekettik qyzmetshiniń teris qylyǵy boıynsha qyzmettik tergeý teris qylyq jasalǵan kezde laýazym atqarǵan memlekettik organnyń ýákiletti tulǵasynyń aktisimen taǵaıyndalady.

Qyzmettik tergeýdiń taǵaıyndalýy týraly jáne ákimshilik memlekettik qyzmetshiniń teris qylyqtary týraly málimetter qyzmettik tergeý taǵaıyndalǵan kúnnen bastap úsh jumys kúni ishinde onyń qazirgi qyzmet atqaratyn memlekettik organynyń ýákiletti tulǵasyna habarlanady.

Qyzmettik tergeý materıaldaryn memlekettik qyzmetshi teris qylyq jasaǵan kezde qyzmet atqarǵan memlekettik organ janyndaǵy komıssııa qaraıdy. Eger komıssııa tártiptik jaza qoldaný týraly usynym shyǵarsa, onda atalǵan organnyń ýákiletti tulǵasy bes jumys kúni ishinde tıisti materıaldardy memlekettik qyzmetshiniń sońǵy jumys orny boıynsha memlekettik organǵa jiberedi.

Ákimshilik memlekettik qyzmetshige tártiptik jaza sońǵy atqarǵan laýazymy boıynsha ýákiletti tulǵa tarapynan tártiptik jaza qoldaný merzimderi sheginde salynady.
Basqa memlekettik organnan berilgen qyzmettik tergeý materıaldaryn jáne tártiptik jaza qoldaný týraly komıssııa usynymyn ýákiletti tulǵa qaraǵan kezde, olar qosymsha qyzmettik tergeýge jiberilmeıdi.

Ákimshilik memlekettik qyzmetshi memlekettik qyzmetin toqtatqan kúnge deıin alynbaǵan tártiptik jaza onyń memlekettik qyzmeti toqtatylǵan kúnnen bastap alynǵan dep esepteledi.

Memlekettik qyzmet isteri agenttigi atalǵan ózgeristerdi memlekettik qyzmetshilerdiń mindetterin tıisinshe oryndaýyn qamtamasyz etýge jáne zań buzýshylyqtardyń aldyn alýǵa baǵyttalǵanyn aıtyp otyr. 

Jarlyq 19 mamyrdan bastap kúshine enedi. 

Eske salsaq, jyl basynda Prezıdent «Memlekettik qyzmet týraly» jańa zań jobasyn ázirleýge qatysty birqatar tapsyrma bergen edi.