Memlekettik qyzmetshiler JI-di kúndelikti jumysyna engizip jatyr
ASTANA. KAZINFORM — 50 myńnan astam memlekettik qyzmetshi jasandy ıntellekt elementterin óz jumysynda qoldanýdy úırendi. QR Jasandy ıntellekt jáne tsıfrlyq damý mınıstrliginiń mamandarynyń habarlaýynsha, bul bastamalar memlekettik apparattyń jumysyn tsıfrlandyrýǵa baǵyttalǵan.
Memlekettik qyzmetshiler AI Qyzmet baǵdarlamasy arqyly jasandy ıntellektini kúndelikti qyzmetinde qoldanýdy úırenedi.
– Memlekettik qyzmetshiler úshin AI Qyzmet baǵdarlamasy jumys isteıdi. Baǵdarlama aıasynda memlekettik apparat qyzmetkerleri jasandy ıntellektini kúndelikti jumys protsesinde qoldanýdyń negizgi stsenarıılerin meńgeredi, – deıdi mınıstrlik mamandary Kazinform tilshisiniń resmı saýalyna bergen jaýabynda.
Bul bastamadan kvazımemlekettik sektor da qalys qalǵan joq.
– Kvazımemlekettik sektorda AI Corporate baǵdarlamasy iske qosylǵan. Memlekettik organdardyń qyzmetinde jasandy ıntellekt elementterin engizý maqsatynda Ulttyq JI platformasy aıasynda e-Gov AI, e-Otinish aqparattyq júıesine arnalǵan JI modýlderi, 102 qyzmetine arnalǵan JI-kómekshi jáne basqa da tsıfrlyq sheshimder kezeń-kezeńimen iske asyrylyp jatyr, – dep habarlaıdy vedomstva ókilderi.
Bul bastamalar memlekettik qyzmet kórsetý sapasyn arttyrýǵa jáne protsesterdi avtomattandyrýǵa múmkindik beredi.
Aıta keteıik, Memleket basshysy 2026 jyldy Tsıfrlandyrý jáne jasandy ıntellekt jyly dep jarııalaý týraly Jarlyqqa qol qoıdy.