Memlekettik qyzmetshiler úshin jańa mansaptyq ósý tetigi engiziledi
ASTANA. KAZINFORM — Memlekettik qyzmettiń tartymdylyǵyn arttyrý maqsatynda «B» korpýsynyń ákimshilik memlekettik qyzmetshileri úshin kóldeneń mansaptyq ósý tetigi qoldanylady.
Bul týraly Memlekettik qyzmet isteri agenttiginiń Astana qalasy boıynsha departamentiniń basshysy Erbol Joldanǵar málim etti.
Endi qyzmetkerler tek joǵary laýazymǵa taǵaıyndalý arqyly ǵana emes, bir laýazym sheńberinde laýazymdyq deńgeıin kóterý arqyly da mansaptyq ilgerileýge múmkindik alady. Jalaqy mólsheri osy deńgeıge baılanysty belgilenedi.
— «Memlekettik qyzmeti týraly» zańda «B» korpýsy memlekettik qyzmetshileri úshin bir laýazym sheńberinde kóldeneń ósý tetigi kózdelgen. Atap aıtqanda, olardyń laýazymdyq jalaqysynyń mólsheri laýazymdyq deńgeıge táýeldi bolady, — dedi Erbol Joldanǵar Astana qalasy kommýnıkatsııalar qyzmetiniń alańynda.
Sondaı-aq atalǵan zańda saılanatyn laýazymdy tulǵalardy memlekettik qyzmetshilerdiń bólek sanatyna jatqyzý qarastyrylǵan. Osy sanattaǵy qyzmetkerlerdiń quqyqtyq mártebesiniń erekshelikteri eskerilip, arnaıy oqytý kýrstarynan ótý tártibi belgilenedi.
— Olar rotatsııadan, ýaqytsha basqa orynǵa jiberilýden jáne tálimgerlikten bosatylady. Sonymen qatar mundaı qyzmetkerlerdi tártiptik teris qylyqtary úshin qyzmetten bosatý tek máslıhat sheshimi negizinde júzege asyrylady, — dep tolyqtyrdy ol.
Aıta keteıik Memleket basshysy «Qazaqstan Respýblıkasynyń memlekettik qyzmeti týraly» zańǵa qol qoıdy.
Buǵan deıin Qazaqstanda memlekettik qyzmetke irikteý júıesi tolyq tsıfrlyq formatqa kóshiriletinin jazǵanbyz.
