Memlekettik qyzmetshiler nelikten tergeý ızolıatorlaryna turaqty ekskýrsııaǵa barady
ASTANA. KAZINFORM – Sybaılas jemqorlyqqa qarsy is-qımyl agenttigi memlekettik qyzmetshiler úshin tergeý ızolıatoryna turaqty ekskýrsııa uıymdastyrý sebebin túsindirildi.
«Agenttik sybaılas jemqorlyq faktilerdiń aldyn alý maqsatynda memlekettik qyzmetshiler úshin tergeý ızolıatorlarynda turaqty túrde ekskýrsııa ótkizedi. Onyń barysynda qatysýshylarǵa tergeý kabınetteri, qylmyskerlerge arnalǵan kameralar, tutqyndardyń serýendeýge arnalǵan orny kórsetiledi», - dedi agenttiktiń resmı ókili Arman Tileýkenov vedomstvoda ótken brıfıngide.
Resmı ókil aıtqandaı, is-sharanyń maqsaty – memlekettik qyzmetshiler, kvazımemlekettik sektor qyzmetkerleri arasynda sybaılas jemqorlyqqa qarsy kúres ádebin qalyptastyrý.
«Túrmege ekskýrsııa jasaý arqyly memlekettik qyzmetshilerge bas bostandyǵynan aıyrý mekemelerinde bolýdyń aýyrtpalyǵyn sezinýge, sybaılas jemqorlyq jáne ózge de qylmystyq quqyq buzýshylyqtar jasaý saldarymen tanysýǵa múmkindik berý. Sonymen qatar profılaktıkalyq is-shara aıasynda sot otyrystaryna eńbek ujymdary da qatysady», - deıdi ol.
