Memlekettik qyzmetshiler mindetti esirtki skrınınginen ótedi

ASTANA. KAZINFORM – Mundaı tekseristen bas tartsa, jumystan shyǵarylady. Bul jóninde QR Memlekettik qyzmet isteri agenttigi tóraǵasynyń orynbasary Salaýat Múksimov Senattyń jalpy otyrysynan keıin jýrnalısterge bergen suhbatynda málimdedi. 

– Tanystyrylǵan zańǵa saı, esirtki skrınıngi jyl saıyn uıymdastyrylady. Memlekettik qyzmetshilerdiń arasyndaǵy basshylyq quramǵa kiretinderi odan ótýge mindetti. Sondaı-aq memlekettik qupııalarǵa baılanysty qyzmet atqaratyn tulǵalar da osy sanatqa kiredi, - dedi ol.

Sonymen birge, esirtki skrınıngi kenetten uıymdastyrylady. 

– Mysaly, memlekettik qyzmetshilerge naýryz aıynda tekseris bolady dep aldyn-ala aıtylmaıdy. Skrınıng kútpegen jerden, tosynnan bolady. Ol jóninde habarlanǵannan keıin, laýazymdy tulǵa 48 saǵat ishinde esirtki skrınınginen ótýi tıis, - dedi Salaýat Múksimov. 

Ol tekseristen keıingi shara jóninde de málimdedi.

– Esirtki nemese psıhotroptyq zattardy qoldanǵany anyqtalǵan jaǵdaıda memlekettik qyzmetshi jumystan shyǵarylady. Al eger mundaı tekseristen ótýden bas tartsa, bul esirtki paıdalanatynyn moıyndaǵan bolyp esepteledi de, qyzmetinen bosatylady, - dedi Memlekettik qyzmet isteri agenttigi tóraǵasynyń orynbasary. 

Aıta keteıik, buǵan deıin QR Parlamenti Senatynyń jalpy otyrysynda «Qazaqstan Respýblıkasynyń memlekettik qyzmeti týraly» zańy men ilespe qujat maquldanǵanyn jazǵanbyz.