Memlekettik qyzmetshiler qandaı zań buzýshylyqtarǵa jıi jol beredi
PETROPAVL. KAZINFORM – Soltústik Qazaqstan oblysynda bıyl memlekettik qyzmetshilerdiń jeke kásipker retinde tirkelýiniń eki faktisi anyqtaldy. Osyǵan oraı memlekettik qyzmettegi antıkorrýptsııalyq shekteýler týraly QR Memlekettik qyzmet isteri agenttiginiń oblys boıynsha departamenti basshysynyń orynbasary Asqar Baımuqanovtan memlekettik qyzmetshiler qandaı talaptardy jıi buzatynyn surap bildik.
- Asqar Qaıyrjanuly, óńirde memlekettik qyzmetshilerdiń kásipkerlikpen aınalysýyna qatysty qandaı zańbuzýshylyqtar anyqtaldy?
- Iıa, eki derek anyqtalyp otyr. Birinshi jaǵdaıda sottyń zańdy kúshine engen sheshimi negizinde memlekettik qyzmetshi zań talaptaryn buzǵan teris qylyǵy úshin memlekettik qyzmetten bosatyldy.
Ekinshi jaǵdaıda memlekettik qyzmetshi bala kútimi boıynsha demalysta júrip, jeke kásipker retinde tirkelgen. Іsti qaraý nátıjesinde sot ony Qazaqstan Respýblıkasynyń Ákimshilik quqyq buzýshylyq týraly kodeksiniń 154-baby boıynsha ákimshilik jaýapkershilikke tartyp, 605 myń teńge mólsherinde aıyppul saldy.
Munda bir mańyzdy jaıtty atap ótken jón. Bala kútimi boıynsha demalysta bolý memlekettik qyzmetshi mártebesin toqtatpaıdy jáne zańda belgilengen antıkorrýptsııalyq shekteýlerdi saqtaý mindetinen bosatpaıdy.
- Búginde óńirde memlekettik organdarǵa tán sybaılas jemqorlyq táýekelderi qandaı?
- Eń jıi kezdesetini - memlekettik qyzmetshilerdiń zańnamada belgilengen antıkorrýptsııalyq shekteýlerdi saqtamaýyna baılanysty. Atap aıtqanda, jaqyn týystardyń bir memlekettik organda tikeleı baǵynystylyqta jumys isteýi jáne múddeler qaqtyǵysy.
Keıde mundaı zań buzýshylyqtar formaldy másele retinde qabyldanady. Alaıda olar sheshimderdiń obektıvti qabyldanbaýyna jáne qyzmettik ókilettikterdiń jeke múdde úshin paıdalanylýyna sebep bolýy múmkin. Sondyqtan bizdiń negizgi mindetimiz - mundaı táýekelderdi aýyr saldarǵa jetkizbeı der kezinde anyqtap, joıý.
- Memlekettik qyzmetshi kásipkerlikpen is júzinde aınalyspasa da, jeke kásipker retinde tirkeýde tura ala ma?
- Joq. Memlekettik qyzmetshi úshin jeke kásipker retinde tirkelýdiń ózi zań talaptaryna qaıshy keledi.
Sonymen qatar «Memlekettik qyzmet týraly» jańa zańda memlekettik qyzmetke kelgenge deıin jeke kásipker nemese sharýa (fermer) qojalyǵynyń múshesi bolǵan azamattarǵa qatysty arnaıy norma qarastyrylǵan.
Olarǵa memlekettik laýazymǵa taǵaıyndalǵan kúnnen bastap alty aı ishinde kásipkerlik qyzmetin toqtatýǵa jáne (nemese) tıesili múlkin ıelikten shyǵarýǵa múmkindik beriledi.
Osy merzim ishinde memlekettik qyzmetshi kásipkerlikpen aınalysýǵa nemese ózine tıesili múlikti basqarýǵa quqyǵy joq. Eger belgilengen merzimde qajetti sharalar qabyldanbasa, bul memlekettik qyzmetten bosatýǵa negiz bolady.
- Mundaı zań buzýshylyqtardyń aldyn alý úshin memlekettik organdar qandaı jumystarǵa basymdyq berýi kerek?
- Eń aldymen, anyqtalǵan faktilerge ǵana áreket etý jetkiliksiz. Múddeler qaqtyǵysynyń týyndaýyna jáne zańda belgilengen shekteýlerdiń saqtalmaýyna ákelýi múmkin jaǵdaılardy aldyn ala anyqtaý mańyzdy.
Sondaı-aq júıeli túrde júrgiziletin túsindirý jumystarynyń mańyzy zor. Árbir memlekettik qyzmetshi ózine qandaı shekteýler qoldanylatynyn, múddeler qaqtyǵysy qandaı jaǵdaıda týyndaıtynyn jáne onyń aldyn alý úshin qandaı áreket etý qajet ekenin naqty bilýi tıis.
Bizdiń maqsatymyz - tek quqyq buzýshylyqtardy anyqtap, kinálilerdi jaýapkershilikke tartý ǵana emes. Eń bastysy - memlekettik qyzmetshilerdiń sybaılas jemqorlyq táýekelderin ózderi aldyn alatyn jáne zań talaptaryn múltiksiz saqtaıtyn qyzmettik mádenıetti qalyptastyrý.
Buǵan deıin Jambyl oblysynda memlekettik qyzmetkerlerge 735 myń teńgeden astam aıyppul salynǵanyn jazǵan edik.
