Memqyzmetshiler men depýtattar jarııalaýǵa mindetti kirister tizimi jańartyldy
ASTANA. KAZINFORM –Memlekettik qyzmet isteri agenttiginiń tóraǵasy bıyl 11 qarashada jańa redaktsııada kiris týraly jarııalanýǵa tıis málimetter tizimin bekitti.
2025 jylǵy 1 qańtardan bastap «Sybaılas jemqorlyqqa qarsy is-qımyl týraly» zańnyń 11-babynyń 9-tarmaǵy kúshine endi. Atalǵan normaǵa sáıkes, 2025 jyldan bastap saıası memlekettik qyzmetshiler, «A» korpýsynyń ákimshilik memlekettik qyzmetshileri, Parlament depýtattary, adam quqyqtary jónindegi ýákil, sýdıalar, kvazımemlekettik sektor sýbektilerinde basqarýshylyq fýnktsııalardy atqaratyn tulǵalar jáne olardyń jubaılary jyl saıyn 31 jeltoqsanǵa deıin ózderiniń kiristeri men múlki týraly deklaratsııalarda kórsetilgen málimetterdi jarııalaýǵa mindetti.
Osyǵan baılanysty Memlekettik qyzmet isteri agenttigi jarııalanýy tıis derekterdiń ózektendirilgen tizimin bekitti.
1. Jeke tulǵa ózi salyq salatyn kirister týraly málimetter:
jalpy soma;
deklaratsııa tapsyrǵan tulǵanyń tegi, aty, ákesiniń aty (bar bolsa).
2. Esepti kezeń ishinde, onyń ishinde QR-dan tys jerde, múlik (aqsha) satyp alý jáne oǵan shyǵyndardy jabý kózderi týraly málimetter:
satyp alynǵan múliktiń túri;
satyp alý faktisi týraly derekter;
múlik alynǵan eldiń kody;
satyp alý quny (baǵasy);
deklaratsııa tapsyrǵan tulǵanyń derekteri.
3. Esepti kezeń ishinde múlikti ıelikten shyǵarý týraly málimetter:
ıelikten shyǵarylǵan múliktiń túri;
múlik ornalasqan eldiń kody;
satylǵan baǵasy (teńge túrinde);
deklaratsııa tapsyrǵan tulǵanyń derekteri.
4. Sheteldegi bankterdegi aqshalar týraly málimetter (jalpy somasy 1 000 AEK-ten asqan jaǵdaıda):
shottardaǵy aqsha somasy;
valıýta kody;
somasy jáne valıýtasy;
bank ataýy;
bank tirkelgen eldiń kody;
deklaratsııa tapsyrǵan tulǵanyń derekteri.
5. 31 jeltoqsanǵa shetelde tirkelgen múlik pen aktıvter týraly málimetter:
múliktiń túri:
memlekettik nemese ózge de esepke alynatyn jyljymaıtyn múlik, kólik jáne t.b.;
Qazaqstannan tys tirkelgen baǵaly qaǵazdar, tsıfrlyq aktıvter;
ınvestıtsııalyq altyn;
shetelde tirkelgen zańdy tulǵanyń kapıtalyndaǵy úles;
múlik tirkelgen eldiń kody;
deklaratsııa tapsyrǵan tulǵanyń derekteri.
Atalǵan derekter memlekettik organdar men uıymdardyń, Parlamenttiń, Joǵarǵy sottyń kadr qyzmetterine usynylady. Sonymen qatar málimetter kadr qyzmetteri arqyly resmı ınternet-resýrstarda esepti jyldan keıingi jyldyń 31 jeltoqsanynan keshiktirilmeı ornalastyrylady.
Eger deklaratsııada kórsetilýge tıis kirister, múlik jáne ózge jańa derekter bolmasa, olar jarııalanbaıdy.
Qujat 2025 jylǵy 28 qarashadan bastap kúshine enedi.
Buǵan deıin Qazaqstan kiristerdi jylystatýǵa qarsy kúres jónindegi halyqaralyq ortalyq qurýǵa qatysatynyn jazǵanbyz.