Memlekettik qyzmetshi jemqorlyq jasasa kim otstavkaǵa ketý kerek – agenttik jaýaby

ASTANA. KAZINFORM – Memlekettik qyzmet isteri agenttigi tóraǵasynyń orynbasary Salaýat Múksimov memlekettik qyzmetshilerdiń jemqorlyqqa barǵany úshin joǵary basshylardyń otstavkaǵa ketý retin taǵy bir túsindirdi.

«Bizde sybaılas jemqorlyq isi boıynsha jaýapkershilik ınstıtýty bar. Jemqorlyq faktisi bolsa ony memlekettik qyzmettiń túrine baılanysty ajyratý kerek. Eger másele memlekettik qyzmetshilerdiń, ıaǵnı ákimshilik laýazymdaǵy basshylardyń jaýapkershiligine qatysty bolsa, onda quqyqtyq jaýapkershilik qarastyrylǵan. Bul jerde eki termın bar. Birinshiden, sot úkiminiń zańdy kúshine enýi, ekinshiden, basshynyń ózi sybaılas jemqorlyqqa qarsy is-qımyl sharalaryn qabyldamaý men bolǵan qylmystyq is – áreket arasyndaǵy sebep-saldarlyq baılanys. Sonymen qatar, saıası qyzmetshilerdiń de jaýapkershiligi de bar. Bul jerde quqyqtyq normamen qatar, saıası jaýapkershilikte bar», - dedi Salaýat Múksimov OKQ-de ótken brıfıngide. 

Onyń aıtýynsha, saıası qyzmetshi jemqorlyq jasap, oǵan sot úkimi shyqqan kezde basshy otstavkaǵa ketedi.

«Eger ákimshilik qurylymnyń (basqarma, departament taǵy basqa) basshysynyń jemqorlyq áreketi týraly aıtatyn bolsaq, onda jetekshilik etetin ákim orynbasaryna jaýapkershiligi qarastyrylady. Aldymen istiń mán-jaıyn zertteý qajet, óıtkeni otstavkaǵa ketýdiń belgili bir sharttary bar. Ár jaǵdaıdy jeke qaraý mańyzdy», - deıdi ol.