Memlekettik qyzmetshi zeınetke shyqqanda 4 jalaqy mólsherinde tólem beriledi – Jańa zań

ASTANA. KAZINFORM – Memlekettik qyzmetshiler eńbekaqysy keminde úsh jylda bir ret mindetti túrde ındeksteledi. Jańa áleýmettik qorǵaý týraly jańashyldyqtar «QR memlekettik qyzmeti týraly» zań jobasynda jazylǵan. 

– Memlekettik qyzmetshilerdiń áleýmettik qorǵalýyna erekshe nazar aýdarylady. Memleketke qyzmet etý jáne memlekettik qyzmetshilerge qoıylatyn joǵary talaptar olardyń áleýmettik turaqtylyǵyn qamtamasyz etýmen úılesimdi túrde ushtasýy tıis. Zań jobasy qyzmettik aýystyrýlar (peredıslokatsııa, rotatsııa, aýysý) kezinde kepildikterdi, demalys jáne mereke kúnderi jumysqa tartylǵany úshin mindetti ótemaqyny, sondaı-aq memlekettik qyzmettegi eńbek ótiline baılanysty qosymsha demalys kúnderin bekitedi, - dedi Memlekettik qyzmet isteri agenttiginiń tóraǵasy Darhan Jazyqbaı Májilistiń jalpy otyrysynda.

Sonymen birge, memlekettik qyzmettegi eńbek ótili keminde 25 jyl bolǵan qyzmetshiler úshin zeınetke shyqqanda 4 laýazymdyq jalaqy mólsherinde mindetti tólem qarastyrylǵan.

Spıkerdiń aıtýynsha, bul shara ádildikti qamtamasyz etýge jáne olardyń memleketke kópjyldyq qyzmetine qurmet bildirýge baǵyttalǵan.

– Zań jobasynda talantty ári yntaly mamandar úshin memlekettik qyzmettiń tartymdylyǵyn arttyrý sharalary da aıqyndalǵan. Atap aıtqanda, mansaptyq ósýdiń jańa tujyrymdamasy engiziledi — tek vertıkaldy ósý ǵana emes, laýazym sheńberinde kásibı damý qarastyrylady. Mundaı tásil memlekettik qyzmetshilerdiń júıeli túrde ózin-ózi damytýyna yqpal etedi, bul túptep kelgende olardyń jalaqysynyń ósýine áser etedi. ıAǵnı bir laýazym sheńberindegi kásibı damý jáne eńbekaqyny keminde úsh jylda bir ret mindetti túrde ındeksteý tıimdi memlekettik qyzmetshiler esebinen ınstıtýtsıonaldyq jadty saqtaýǵa baǵyttalǵan, - dedi D. Jazyqbaı. 

Aıta keteıik, Májiliste «QR memlekettik qyzmeti týraly» zań jobasy birinshi oqylymda maquldandy. Memlekettik qyzmetshilerdiń qyzmetine sońǵy túpkilikti baǵany el azamattary berýi kerek.