Memlekettik qyzmetshi tártip buzsa, jaýapkershiligi qalaı ólshenedi
ASTANA. KAZINFORM — Memlekettik qyzmetshilerdiń tártiptik jaýapkershiligine qatysty kózqaras túbegeıli qaıta qaralyp jatyr. Onyń basty maqsaty — jazalaý emes, aldyn alý sharalary men qyzmettik tártip bolmaq. Bul jańashyldyqtar «QR memlekettik qyzmeti týraly» zań jobasynda jazylǵan.
Memlekettik qyzmet isteri agenttiginiń tóraǵasy Darhan Jazyqbaıdyń aıtýynsha, zań jobasynda jaýapkershilikti jeńildetetin (teris saldardyń bolmaýy) jáne aýyrlatatyn mán-jaılar (qyzmettik mindetterdi óreskel buzý, tártiptik teris qylyqty alkogoldik, esirtkilik, ne ózge de mas kúıde jasaý) naqty aıqyndalady.
— Tártiptik teris qylyqtyń aýyrlyǵy men kiná dárejesin eskere otyryp, tártiptik jazalardyń qoldanylý merzimi 2 aıdan 6 aıǵa deıin saralanady, — dedi D. Jazyqbaı Májilistiń jalpy otyrysynda.
Sonymen birge, Memleket basshysy jaýapty sheshimder qabyldaý kezinde týyndaıtyn saldardan memlekettik qyzmetshilerdiń qaýiptenetinin birneshe ret atap ótken bolatyn.
— Mundaı jaǵdaılarda árbir árekettiń ýájin naqty ajyrata bilý asa mańyzdy. Osyǵan baılanysty zań jobasynda, eger qabyldanǵan sheshimder azamattardyń ómirin, quqyqtary men zańdy múddelerin qorǵaýǵa baǵyttalǵan bolsa, jaýapkershilikti boldyrmaıtyn jaǵdaılar aıqyn bekitilgen, — dep atap ótti agenttik tóraǵasy.
Odan bólek, memlekettik qyzmetshilerdiń kásibı táýelsizdigine beriletin kepildikter kúsheıtiledi. Qyzmetke negizsiz qysym jasaýǵa, aralasýǵa, dálelsiz aıyp taǵýǵa jol berilmeıdi.
— Qyzmetshilerdi quqyqtyq turǵydan qorǵaý memlekettiń mindeti. Bul — adal ári salmaqty sheshimder qabyldaýdyń qajetti sharty, — dedi Darhan Jazyqbaı.
Aıta keteıik, Májiliste «QR memlekettik qyzmeti týraly» zań jobasy birinshi oqylymda maquldandy. Memlekettik qyzmetshilerdiń qyzmetine sońǵy túpkilikti baǵany el azamattary berýi kerek.
Sondaı-aq, memlekettik qyzmetshiler eńbekaqysy keminde úsh jylda bir ret mindetti túrde ındeksteledi. Zeınetke shyqqanda 4 jalaqy mólsherinde tólem beriledi.
