Memlekettik qyzmetshilerge jańa etıkalyq standarttar engiziledi — Jumanǵarın
ASTANA. KAZINFORM — Eldiń damýynyń uzaq merzimdi qujaty ázirlenedi. Bul týraly Úkimet otyrysynda Prezıdent Joldaýyn iske asyrýdy talqylaý barysynda Premer-mınıstrdiń orynbasary — Ulttyq ekonomıka mınıstri Serik Jumanǵarın málim etti.
— Reformalardyń ınstıtýtsıonaldyq negizderin kúsheıtý aıasynda tıisti Keshendi jospar qabyldanatyn bolady. Memlekettik qyzmetshiler úshin jańa etıkalyq standarttar men qaǵıdattar engiziledi. Júrgizilip jatqan ózgeristerdiń strategııalyq baǵdary retinde eldiń damýynyń uzaq merzimdi qujaty ázirlenetin bolady, — dedi Serik Jumanǵarın.
Onyń aıtýynsha, bul qujatty Prezıdent Ákimshiligi, Strategııalyq josparlaý jáne reformalar agenttigi jáne Strategııalyq zertteýlerdiń Qazaqstandyq ınstıtýty ázirleıdi.
— Bul rette, áleýmettik-ekonomıkalyq saıasatty iske asyrýǵa Úkimettiń ózi jaýapty bolǵandyqtan, biz bul jumysqa belsendi aralasamyz jáne eldiń damýyna eleýli úlesimizdi qosamyz. Úkimet Jalpyulttyq is-sharalar josparynyń barlyq baǵyttynyń ýaqtyly jáne sapaly oryndalýyn qamtamasyz etiletin bolady, — dedi mınıstr.
Buǵan deıin habarlanǵandaı, búgin Úkimet otyrysynda Memleket basshysynyń bıylǵy 28 qazandaǵy «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn iske asyrý jónindegi jalpyulttyq is-sharalar josparynyń» jobasy maquldanyp, tıisti qaýly qabyldandy.
