Memlekettik qyzmetkerlerdiń týystaryn qyzmetke alýyna baılanysty shekteýler kúsheıtiledi
ASTANA. KAZINFORM – Senat depýtattary «Qazaqstan zańnamasyna sybaılas jemqorlyqqa qarsy is-qımyl máseleleri boıynsha ózgerister men tolyqtyrýlar engizetin zań men oǵan ilespe qujatty qarap jatyr.
Qujatty talqylaý kezinde Palata spıkeri Máýlen Áshimbaev Memleket qyzmet ister jónindegi agenttik tóraǵasynyń orynbasary Salaýat Syılybaevtan zańdaǵy týystardyń bir qyzmette isteýin shekteıtin normalardy naqtylaýdy surady.
- Shekteýdiń tórt túrin engizýdi usynyp otyrmyz. Birinshiden, basshynyń tikeleı baǵynysynda onymen týys adamdar jumys isteı almaıdy degen qazir de bar norma kúshin saqtaıdy. Ekinshiden, usynylatyn zań boıynsha, basshy memlekettik organnyń qurylymdyq bólimshelerine jaqyn týystaryn taǵaıyndaı almaıdy. Tipti tikeleı baǵynyshty bolmasa da, taǵaıyndaı almaıdy. Buǵan deıin osyndaı praktıka másele bolǵan. Basshynyń orynbasary jaýap beretin saladaǵy departament dırektorlyǵyna óz týysyn taǵaıyndap, bul meniń qadaǵalaýyma atpaıtyn sala dep jaltaratyn. Taǵaıyndaý ǵana emes, mundaı qatynasta bir qyzmette júre de almaıdy, - dedi ol.
Onyń aıtýynsha, zańnamaǵa «jaýapty sala» uǵymy engiziledi.
- Basshy jaýapty salada eshqandaı jaqyn týysy bolmaý kerek.
Tórtinshiden, vedomstvolyq baqylaýdaǵy qyzmetterde de týystyq qatynasqa shekteý qoıylady. Memlekettik organdardyń ishki qaýipsizdik, ishki aýdıt qyzmetteri bolady. Osy salada da týystardyń bir salada qyzmet etýine shekteý qoıylady. Mysaly, respýblıkadaǵy basshynyń týysy oblystaǵy, aýdandaǵy salalarynda jumys isteı almaıdy. Basqasha aıtsaq, ishi qaýipsizdik salasynyń basshysy oblystyq nemese aýdandyq deńgeıde dál sondaı qyzmetti atqaratyn týysy bolsa, ol qyzmetinde jumys isteı almaıdy, - dedi Salaýat Syılybaev.
Buǵan deıin prokýratýra men sybaılas jemqorlyqqa qarsy qyzmetke qabyldaý erejesi ózgerýi múmkin ekenin jazǵan edik.
