Memlekettik qyzmetke úmitkerler sany 2,7 ese ósti

ASTANA. KAZINFORM – Memlekettik qyzmetke úmitkerler sany 2,7 ese ósti. Bul týraly Memlekettik qyzmet isteri agenttiginiń 2023 jylǵy jumys qorytyndysyna arnalǵan jıynda vedomstvo basshysy Darhan Jazyqbaı aıtty.

Onyń atap ótýinshe, ótken jyly memlekettik qyzmetke irikteýdiń jańa algorıtmi 6 memlekettik organda, atap aıtqanda Memlekettik qyzmet isteri agenttigi, Kólik mınıstrligi, Ónerkásip jáne qurylys mınıstrligi, Saýda jəne ıntegratsııa mınıstrligi jáne Aqmola oblysy men Shymkent qalasy ákimdikterinde synaqtan ótkizildi. Sonymen qatar agenttik irikteýdi tolyq tsıfrlandyrý arqyly «e-Qyzmet» ıntegratsııalanǵan aqparattyq júıesin jańǵyrtý boıynsha jumystar júrgizdi.

«Syrtqy portalda memlekettik qyzmetke jańa irikteý algorıtmi ázirlendi, onda konkýrstyq rásimdi ótkizý formaty qaıta qaraldy. Konkýrstyq rásimniń jańa formaty úmitkerlerge aldyn ala belgilengen ýaqytta ótetin áńgimelesýden basqa barlyq kezeńderde, kez kelgen ýaqytta jáne álemniń kez kelgen jerinen konkýrsqa qatysýǵa múmkindik berdi. Memlekettik organdarda ótkizilgen 1246 astam konkýrsqa 5 815 úmitker qatysyp, onyń 652-i jeńimpaz retinde tanyldy», - dedi ol.

Darhan Jazyqbaıdyń aıtýynsha, onlaın júıe boıynsha bir orynǵa qatysýshylardyń úles kórsetkishi 4,6 adamdy qurap, qoldanystaǵy (1,7 adam) irikteý tártibimen salystyrǵanda qatysýshylardyń sany 2,7 esege artty. Bul, azamattardyń jańa joba aıasynda memlekettik qyzmetke degen qyzyǵýshylyǵy birshama artqanyn kórsetip otyr. Bıyl jańa irikteý júıesin kezeń-kezeńmen barlyq memlekettik organdarda engizý josparlanyp otyr.

Sondaı-aq MQІA basshysy memlekettik qyzmettegi bıýrokratııalyq kedergilerden arylýdyń mańyzdy quraly retinde kadrlyq protsesterdi odan ári tsıfrlandyrý boıynsha agenttik júrgizip jatqan sharalar týraly aıtty.