Memlekettik qyzmetke úmitker 73 myńnan astam kandıdattyń qanshasy ótti
ASTANA.KAZINFORM — Bıylǵy jyldyń birinshi jartyjyldyǵynda Qazaqstanda memlekettik qyzmetke ornalasý úshin 73 myńnan astam kandıdat baq synap, onyń 8 398-i jeńimpaz atandy. Jańa tsıfrlyq irikteý júıesi konkýrs merzimin 5–7 jumys kúnine deıin qysqartty. Bul týraly Memlekettik qyzmet isteri agenttigi málim etti.
Agenttiktiń málimetinshe, 2023 jyldan bastap kezeń-kezeńimen engizý arqyly memlekettik qyzmet salasyna qatysty kadrlyq protsester tsıfrlyq formatqa kóshirilgen.
Atap aıtqanda, memlekettik qyzmetke irikteý jáne qabyldaý protsesin tolyq tsıfrlandyrýdy, barlyq konkýrstyq rásimderdiń ashyqtyǵy men obektıvtiligin qamtamasyz etetin «eqyzmet.gov.kz» júıesiniń syrtqy portaly ázirlendi. Bos laýazymdy tańdaý jáne konkýrsqa qatysýǵa ótinim berýden bastap laýazymǵa taǵaıyndaýǵa deıingi barlyq protsester tolyq avtomattandyrylǵan jáne «E-qyzmet» yqpaldastyrylǵan aqparattyq júıesinde júzege asyrylady.
2025 jylǵy 1 shildeden bastap jańa tsıfrlyq irikteý búkil memlekettik apparatty qamtydy.
Tsıfrlyq irikteý kandıdattar arasyndaǵy básekelestikti arttyrdy. 2025 jyly bir bos orynǵa orta eseppen 6-7 kandıdattan keledi. Bul dástúrli irikteýmen salystyrǵanda 4 esege kóp.
— Bıylǵy jyldyń I jartyjyldyq qorytyndysy boıynsha 10 607 bos memlekettik laýazymǵa 73 211 kandıdat qatysyp, 8 398 kandıdat jeńimpaz dep tanyldy, — delingen habarlamada.
Sonymen qatar, jańa júıe konkýrstyq rásimderdiń merzimin qysqartty: memlekettik organ bos laýazymdy 5–7 jumys kúni ishinde toltyra alady. Buǵan deıin bul protsess 23–30 jumys kúnin alatyn.
Aıta keteıik, memlekettik qyzmet kórsetý salasyndaǵy 400 myń zań buzýshylyqanyqtalyp, 627 qyzmetker jazalandy.
