Memlekettik qyzmetke irikteýdiń jańa avtomattandyrylǵan modeli tanystyryldy
ASTANA. KAZINFORM — Búgin Qazaqstan Respýblıkasy Memlekettik qyzmet isteri agenttiginiń tóraǵasy Darhan Jazyqbaı Parlament Senatynyń janyndaǵy «Taldaý mektebiniń» tyńdaýshylarymen kezdesti.
Kezdesý servıstik jáne klıentke baǵdarlaný qaǵıdattaryna sáıkes gıbrıdti model negizinde memlekettik apparatty kásibılendirý, memlekettik qyzmetti tsıfrlandyrý, HR-protsesterdi jetildirý, jasandy ıntellekt taqyryptaryn qamtydy.
Іs-shara barysynda agenttiktiń memlekettik basqarýǵa zamanaýı tehnologııalardy engizý baǵytyndaǵy negizgi bastamalary tanystyryldy. Ásirese «E-qyzmet» ıntegratsııalanǵan aqparattyq júıesi negizinde ázirlengen memlekettik qyzmetke irikteýdiń tolyq avtomattandyrylǵan jańa modeline erekshe nazar aýdaryldy.
Sondaı-aq qatysýshylarǵa kadrlyq áleýetti basqarýǵa arnalǵan ınteraktıvti analıtıkalyq materıaldar kórsetilip, strategııalyq basqarýshylyq sheshimder qabyldaýda derekterdi taldaýdyń mańyzy atap ótildi.
Memlekettik basqarý salasyna jasandy ıntellekt tehnologııalaryn engizýge baǵyttalǵan «AI zerthanasynyń» tanystyrylymy qatysýshylardyń erekshe qyzyǵýshylyǵyn týdyrdy.
Atap aıtqanda, Smart HR ıntellektýaldy kadr irikteý platformasynyń múmkindikteri usynyldy.
Budan bólek, Darhan Jazyqbaı «Zań men tártip», «Halyq únine qulaq asatyn memleket» jáne «Adal azamat» qaǵıdattarynyń ornyǵýy Ádiletti Qazaqstandy qalyptastyrýdaǵy negizgi ustanym ekenin aıtyp, qatysýyshylardy tolǵandyrǵan suraqtarǵa jaýap berdi.
Kezdesý sońynda «Taldaý mektebi» tyńdaýshylary memlekettik qyzmetti odan ári damytý, tsıfrlyq sheshimderdi engizý jáne jasandy ıntellektini praktıkalyq turǵyda qoldaný boıynsha oı-pikirlerin ortaǵa saldy.
