«Memlekettik qyzmet týraly» jańa zań jobasy daıyndalady
ASTANA. KAZINFORM – «Memlekettik qyzmet týraly» jańa zań jobasy daıyndalady. Bul týraly Memlekettik qyzmet isteri agenttiginiń tóraǵasy Darhan Jazyqbaı aıtty.
«Agenttik aldaǵy ýaqytta da memlekettik qyzmet salasyndaǵy zańnamany ary qaraı jetildire beredi. Osy oraıda memlekettik qyzmetti júıeli damytý maqsatynda Prezıdentiń Jarlyǵymen 2024-2026 jyldary arnalǵan jańa tujyrymdama bekitildi. Bul memlekettik qyzmettiń tıimdiligin arttyrýǵa, onyń ashyqtyǵyn qamtamasyz etýge jáne adamǵa baǵdarlanǵan memlekettik apparattyń servıstik modelin qalyptastyrýǵa yqpal etedi dep kútilýde. Atalǵan qujat aıasynda «Memlekettik qyzmet týraly» jańa zań jobasy daıyndalatyn bolady. Onyń negizgi maqsattarynyń biri – memlekettik qyzmettegi eńbek qatynastaryn retteýmen shektelmeı, qoǵam men memlekettik qyzmetshi arasyndaǵy ózara baılanysty zań deńgeıinde retteý», - dedi ol agenttikte ótken «Qazaqstandaǵy memlekettik qyzmet: jetistikteri men perspektıvalary» taqyrybyndaǵy dóńgelek ústel otyrysynda.
Onyń atap ótýinshe, jańa zańnama irikteý júıesin jetildirýge, erte kásiptik baǵdarlaý jáne mansaptyq ósýdi gıbrıdtik modelderine saı jańa tetikterin engizý arqyly memlekettik apparatty kásibılendirýge baǵyttalady.
«Sondaı-aq qyzmetshiler rotatsııasyn keńeıtý, áleýmettik kepildikterin jaqsartý, tártiptik jaýapkershilikke tartý erejelerin de qaıta qaraý jáne jasandy ıntellekt elementterin qoldana otyryp, memlekettik qyzmet protsesterin tolyq tsıfrlandyrý josparlanǵan», - dedi Darhan Jazyqbaı.
