Memlekettik qyzmet salasynda 50-ge jýyq jańa akt ázirlenbek
ASTANA. KAZINFORM – Parlamentte «Qazaqstan Respýblıkasynyń memlekettik qyzmeti týraly» jáne sybaılas jemqorlyqtyń aldyn alýǵa qatysty zań jobalary qaralyp jatyr.
Memlekettik qyzmet isteri agenttigi janyndaǵy Qoǵamdyq keńestiń jańa quramy alǵashqy otyrysyn ótkizdi. Keńes quramyna Parlament depýtattary, zańgerler, ǵalymdar, qoǵamdyq belsendiler men medıa-menedjerler engen. Otyrysta Qoǵamdyq keńestiń qurylymdyq jáne uıymdastyrýshylyq máseleleri qaralyp, kún tártibindegi suraqtar boıynsha tıisti sheshimder qabyldandy.
Agenttik tóraǵasy Darhan Jazyqbaı memlekettik qyzmet pen basqarý júıesiniń ashyqtyǵyn qamtamasyz etý, sondaı-aq sybaılas jemqorlyqtyń aldyn alý baǵytynda júzege asyrylyp jatqan jáne josparlanǵan jobalar týraly baıandady. Óz sózinde agenttik tóraǵasy Memleket basshysynyń Ulttyq quryltaıdyń ekinshi otyrysynda aıtqan «Halyq únine qulaq asatyn memleket» tujyrymdamasynyń mańyzdylyǵyna toqtalyp, sheshim qabyldaý barysynda azamattardyń pikirin eskerý qajettigin atap ótti. Qoǵammen ashyq dıalog ornatý memlekettik organdardyń negizgi mindetteriniń biri.
Sondaı-aq, sońǵy tórt jylda memlekettik qyzmet salasynda iske asyrylǵan reformalardyń nátıjeleri usynyldy. Atap aıtqanda, memlekettik grant negizinde oqý ornyn úzdik aıaqtaǵan túlekterdi aýdandyq jáne aýyldyq deńgeıdegi laýazymdarǵa konkýrstyq irikteýsiz tikeleı taǵaıyndaý tetigi engizildi. Memlekettik qyzmet kórsetý sapasyn arttyrý maqsatynda qyzmet alýshylardyń quqyqtaryn proaktıvti túrde qashyqtan monıtorıngteý júıesi iske qosyldy.
Іrikteý jáne qabyldaý úderisterin tolyq tsıfrlandyrý aıasynda «E-Qyzmet» yqpaldastyrylǵan aqparattyq júıesi jańǵyrtyldy. Bul bastamalar qoǵam tarapynan oń baǵalanyp otyr. Agenttik tóraǵasy ótken jyly vedomstvoǵa berilgen sybaılas jemqorlyqqa qarsy saıasatty iske asyrý jáne úılestirý, sondaı-aq sybaılas jemqorlyqqa qarsy mádenıetti qalyptastyrý baǵytyndaǵy fýnktsııalardyń oryndalýyna da toqtaldy. Bul jumystar júıeli túrde jalǵasatynyn aıtty.
Darhan Jazyqbaı aldaǵy kezeńde Qoǵamdyq keńes múshelerimen birlesip memlekettik qyzmettiń tıimdiligin arttyrý jáne sybaılas jemqorlyqtyń aldyn alý baǵytynda keshendi jumystar júrgiziletinin jetkizdi.
— Bizdiń maqsatymyz — halyqqa ashyq, adal qyzmet kórsetetin, bıýrokratııadan arylǵan servıstik memlekettik apparat qalyptastyrý, — dedi ol.
Qazirgi ýaqytta Parlamentte «Qazaqstan Respýblıkasynyń memlekettik qyzmeti týraly» jáne sybaılas jemqorlyqtyń aldyn alýǵa qatysty zań jobalary qaralýda. Atalǵan qujattar qabyldanǵannan keıin memlekettik qyzmet salasynda shamamen 50, al sybaılas jemqorlyqtyń aldyn alý baǵytynda 20–30-ǵa jýyq zańǵa táýeldi aktiler ázirlenedi. Osyǵan baılanysty Qoǵamdyq keńes múshelerine atalǵan normatıvtik quqyqtyq aktilerdi qaraý jumystaryna belsendi qatysý mindeti júkteledi.
Otyrys qorytyndysy boıynsha Qoǵamdyq keńes tóraǵasy áriptesterin zańda belgilengen ókilettikter sheńberinde ýákiletti organnyń bastamalary men jobalaryn ilgeriletýge shaqyrdy. Jıyn sońynda keńes músheleri óz usynystary men pikirlerin bildirip, qaralǵan máseleler boıynsha tıisti sheshimder qabyldady.
Aıta ketelik memlekettik qyzmetke qabyldaý erejesi ózgertiletini týraly jazǵan edik.
