Memlekettik qyzmet kórsetý salasyndaǵy 400 myń zań buzýshylyq: 627 qyzmetker jazalandy
ASTANA. KAZINFORM — Jyl basynan beri Memlekettik qyzmet isteri agenttigi memlekettik kórsetiletin qyzmetterdiń sapasyna 2 myńnan astam baqylaý júrgizgen. Bul týraly Memlekettik qyzmet isteri agenttigi málim etti.
Búginde elimizde memlekettik kórsetiletin qyzmetterdiń 1 476 túri bar. Olardyń qatarynda qujattardy berý jáne tirkeý, áleýmettik tólemder men járdemaqylardy taǵaıyndaý, anyqtamalar men lıtsenzııalar berý jáne basqa da qyzmetter bar.
— Júrgizilgen baqylaý nátıjesinde 400 myńǵa jýyq zań buzýshylyq anyqtalyp, 10 myńnan astam azamattyń buzylǵan quqyqtary qalpyna keltirildi, — delingen agenttiktiń habarlamasynda.
Bıyl zań buzýshylyqtarǵa baılanysty memlekettik organdarǵa 1010 usynym engizilgen.
— 627 qyzmetker tártiptik jaýapkershilikke tartyldy. Memlekettik qyzmet kórsetý merzimi men tártibin buzǵan laýazymdy tulǵalarǵa qatysty 433 ákimshilik hattama toltyryldy. Sot sheshimimen bıýdjetke 24,5 mıllıon teńge aıyppul óndirildi, — dep habarlady Memlekettik qyzmet isteri agenttigi.
Aıta keteıik, memlekettik qyzmetshiler úshin jańa mansaptyq ósý tetigi engiziledi.
