Memlekettik qyzmet kórsetýde jasandy ıntellekt múmkindikterin keńinen paıdalanýdyń mańyzy zor - Prezıdent

Jasandy ıntellektini qoldaný aıasyn jáne ony damytýdyń mindetteri men quraldaryn aıqyndaıtyn strategııalyq qujat qabyldaý kerek. Bul týraly «Digital Bridge 2023» halyqaralyq tehnologııalyq forýmynda Memleket basshysy Qasym-Jomart Toqaev aıtty, dep habarlaıdy Kazinform.

«Jasandy ıntellektini qoldaný aıasyn jáne ony damytýdyń mindetteri men quraldaryn aıqyndaıtyn strategııalyq qujat qabyldaý kerek. Bul – halyqaralyq ozyq tájirıbe. Mundaı qadam elimizdi tehnologııalyq turǵyda damytýdyń ornyqty baǵytyn aıqyndaýǵa múmkindik beredi. Eń aldymen, jasandy ıntellekt tehnologııasyn ekonomıkamyzdyń munaı-gaz sektory, energetıka, aýyl sharýashylyǵy, kólik jáne logıstıka sekildi mańyzdy salalaryna engizýge mán berýimiz qajet dep sanaımyn. Jasandy ıntellekt qalalarymyzdy ómir súrýge jáne jumys isteýge qolaıly ári tolyqqandy aqyldy qalaǵa (smart city) aınaldyrý protsesin aıtarlyqtaı dárejede ońtaılandyra alady», - dedi Prezıdent.

Qasym-Jomart Toqaev memlekettik qyzmet kórsetý kezinde jasandy ıntellekt múmkindikterin keńinen paıdalanýdyń da mańyzy zor ekendigine nazar aýdartty.

«Bul oraıda biz eleýli nátıjege qol jetkizdik. Atap aıtqanda, azamattardyń áleýmettik ál-aýqatynyń deńgeıin anyqtaýǵa jáne olarǵa proaktıvti memlekettik qoldaý kórsetýge múmkindik beretin «Otbasynyń tsıfrlyq kartasy» iske qosyldy. Mundaı ónimdi «Báıterek» holdıngi bazasynda bıznes úshin de engizý kerek. Meniń tapsyrmam boıynsha bul baǵytta aýqymdy tsıfrlyq transformatsııalaý jumystary bastalyp ketti», - dedi Memleket basshysy.