Memlekettik qyzmet kórsetetin portaldar ýaqytsha qoljetimsiz bolady

ASTANA. KAZINFORM – «Ulttyq aqparattyq tehnologııalar» AQ qoldaý kórsetetin jobalardyń tsıfrlyq ekojúıesiniń turaqty jumysyn qamtamasyz etý maqsatynda jospardan tys tehnıkalyq tekserister júrgiziledi.

Tehnıkalyq jumystar 2025 jylǵy 17 mamyr saǵat 00:00-den 08:00-ge deıin júrgiziledi.

Osy kezeńde kelesi memlekettik elektrondyq servısterdiń jumysy ýaqytsha shekteledi:

• eGov.kz portaly men eGov mobile mobıldi qosymshasy («Tsıfrlyq qujattar» servısin qosa alǵanda);
• e-Otinish, E-license portaldary jáne Ashyq úkimet júıeleri;
• QR Ulttyq kýálandyrýshy ortalyǵy servısteri;
• «UAT» AQ súıemeldeıtin ózge de jobalar;

Elektrondyq úkimet shlıýzi arqyly ıntegratsııalanǵan ekinshi deńgeıli bankterdiń mobıldi qosymshalaryndaǵy jáne basqa júıelerdegi memlekettik qyzmet kórsetý servısteri.

- Osyǵan baılanysty, barlyq operatsııany aldyn ala aıaqtaýdy jáne tehnıkalyq jumystar kezinde qujattardy usyný qajet bolǵan jaǵdaıda olardyń túpnusqasyn daıyndaýdy usynamyz,- dep jazylǵan eGov.kz portalynyń Telegram paraqshasynda. 
eGov.kz portalynda taıaýda qosylǵan qyzmetterge toqtalsaq, endi áskerı oqý oryndary eGov.kz portaly arqyly ótinim qabyldaıdy.

Sonymen qatar eGov Mobile arqyly qazaqstandyqtar jeke derekteriniń taralý jaǵdaıyn tekserýge bolady. 

Odan bólek eGov portalynyń kómegimen zańsyz tirkelgen SIM-kartany anyqtaý múmkindigi bar.