Memlekettik qyzmet gıbrıdti modelge kóshedi
ASTANA. KAZINFORM - Bıyl elimizdiń erekshe mártebesi bar joǵary oqý orny – memlekettik qyzmetshilerdi daıarlaý, qaıta daıarlaý jáne olardyń biliktiligin arttyrýdy júzege asyratyn QR Prezıdentiniń janyndaǵy Memlekettik basqarý akademııasynyń qurylǵanyna 30 jyl toldy.
Búgin osy mereıtoılyq kúnge oraı uıymdastyrylǵan «Memlekettik basqarý jáne memlekettik qyzmet: búgini men bolashaǵy» taqyrybynda halyqaralyq ǵylymı-praktıkalyq konferentsııa ótti. Onyń maqsaty – memlekettik qyzmet júıesindegi adam resýrstaryn basqarýǵa qatysty tyń ıdeıalar men ádis-tásilderdi talqylaý jáne tıimdi praktıkalyq sheshimderdi izdeý.
Konferentsııa el Prezıdenti Qasym-Jomart Kemeluly Toqaevtyń quttyqtaý sózimen ashyldy. Memleket basshysynyń quttyqtaýynda: «30 jyl ýaqyt aralyǵynda akademııa elimizdiń bilim júıesindegi bedeldi oqý oryndarynyń birine aınaldy. Memlekettik qyzmetshilerdiń biliktiligin shyńdaý isin jetildirip, ony jańa deńgeıge kóterdi. Ozyq oıly, otanshyl ári kásibı mamandar daıarlaýdyń ózindik dástúrin qalyptastyrdy. El múddesin bárinen bıik qoıyp, Ádiletti Qazaqstandy qurýǵa atsalysý – árbir memlekettik qyzmetshiniń mindeti. Olardyń adal, jańashyl ári jasampaz bolýy asa mańyzdy. Akademııa osy asyl qasıetterdi ár túlektiń boıyna sińirip, memleketshil mamandardyń jańa býynyn tárbıeleýge zor úles qosyp keledi. Munyń bári oqytýshylar qaýymynyń eseli eńbeginiń nátıjesi ekeni sózsiz. Bilim ordasynyń ujymy aldaǵy ýaqytta da el ıgiligine qyzmet ete beredi dep senemin»,- delingen.
Konferentsııaǵa Qazaqstan Respýblıkasy Prezıdenti Ákimshiliginiń jaýapty qyzmetkerleri, Parlament depýtattary, memlekettik organdardyń basshylary, , memleket jáne qoǵam qaıratkerleri, Astana memlekettik qyzmet haby basqarýshy komıtetiniń, shetelderden kelgen ǵalymdar men memlekettik sektor ókilderi, sondaı-aq bilim berý uıymdarynyń basshylary men halyqaralyq sarapshylar, memlekettik qyzmetshiler men azamattyq qoǵam ókilderi qatysty.
Іs-shara barysynda Memlekettik qyzmet isteri agenttiginiń tóraǵasy Darhan Jazyqbaı Prezıdent janyndaǵy Akademııa óziniń 30 jyldyq tarıhynda ǵylymı bazasy qalyptasqan, memlekettik basqarý salasyna qajetti mamandar daıarlaıtyn tolyqqandy oqý ordasyna aınalǵanyn atap ótti.
«Akademııa óziniń 30 jyldyq tarıhynda memlekettik qyzmetshilerdiń kásibı biliktiligin shyńdap, memlekettik qyzmetshiler arasynda joǵary basqarýshylyq mádenıettiń qalyptasýyna úlken úles qosyp keledi. Álemde ózgeris qarqyny kúsheıip, básekelestiktiń artyp otyrǵany barshamyzǵa málim. Ýaqyttyń kóshimen birge júrý úshin ǵylym-bilimdegi ozyq ádisterge saı adam kapıtalyn úzdiksiz damytý qajet. Memleket basshysy Qasym-Jomart Kemeluly Toqaev Qazaqstan halqyna Joldaýynda memlekettik qyzmetshilerdiń biliktiligin arttyrý máselesi áli de ózektiligin atap ótti. Memleket pen qoǵam arasyndaǵy dıalogtyń sapasyn odan ári arttyra túsý úshin adal ári ádil bolýymyz, tek zań aıasynda áreket etýimiz, bergen ýádemiz ben isimiz úshin jaýap bere bilýimiz kerek ekenin alǵa qoıdy. Bul rette, oqý úrdisinde zaman talabyna jaýap beretin ınnovatsııalyq bilimmen qatar joǵary adamı qundylyqtarǵa bastaıtyn «Adal azamat» ıdeıasyn memlekettik qyzmetshilerdiń sanasyna ornyqtyrý mańyzdy», - dedi MQІA tóraǵasy.
Konferentsııaǵa qatysýshylar elimizde memlekettik qyzmetti jańǵyrtýǵa baǵyttalǵan ózgerister júzege asyrylyp jatqanyn atap ótti. Memlekettik qyzmettegi kadrlyq protsesster «eQyzmet» júıesinde tsıfrlandyryldy, konkýrstyq irikteýlerdiń ashyqtyǵy men ádildigin qamtamasyz etildi, sonyń arqasynda bos laýazymdarǵa konkýrsqa qatysýshylar sanyn eki esege artty.
Prezıdent aıqyndaǵan «adam memleket úshin emes, memleket adam úshin» qaǵıdasyna saı kásibı ári servıstik memlekettik apparatty qalyptastyrýǵa baǵyttalǵan Memlekettik qyzmetti damytýdyń 2024-2029 jyldarǵa arnalǵan jańa tujyrymdamasy aıasynda memlekettik qyzmettiń gıbrıdti modeline kóshý boıynsha sharalar qabyldanýda.
Ǵylymı-praktıkalyq konferentsııa aıasynda servıstik jáne adamǵa baǵdarlanǵan memlekettik qyzmetti qalyptastyrý, memlekettik basqarýdaǵy zamanaýı úrdister, kadrlyq protsesterdi tsıfrlandyrý jáne memlekettik qyzmetter kórsetý, jasandy ıntellektti paıdalaný, memlekettik qyzmetti kásibılendirý máselelerin talqylaý boıynsha sektsııalyq otyrystar uıymdastyrylyp, ózge memleketterdiń memlekettik basqarý akademııalary rektorlarynyń kezdesýi jáne túlekter forýmy ótti.
Sektsııalarda baıandamashylar memlekettik basqarý máseleleri boıynsha óz bastamalary men kózqarastaryn ortaǵa salyp, memlekettik qyzmetti odan ári damytý jónindegi oılarymen bólisti.
Іs-shara aıasynda memlekettik qyzmettiń kásibı biliktiligin arttyrýǵa úles qosqan memlekettik qyzmetshiler men Akademııa qyzmetkerleri Qazaqstan Respýblıkasy Prezıdentiniń «Qurmet» gramotalary, «Alǵys» tósbelgileri, «Alǵys» hattarymen marapattaldy.
Konferentsııa sońynda MQІA tóraǵasy qatysýshylarǵa mazmundy baıandamalary men tujyrymdy oılary úshin alǵysyn bildirip, olardyń aldaǵy ýaqytta Agenttik pen Memlekettik basqarý akademııasynyń jumysynda eskeriletindigin aıtyp, Akademııa ujymynyń alda atqarar qyzmetine jemisti nátıje tiledi.
