Erlan Qarın ıÝNESKO-nyń Bas konferentsııasynda Prezıdenttiń jańa bastamalary týraly aıtty
ASTANA. KAZINFORM -Qazaqstan Respýblıkasynyń Memlekettik keńesshisi – Qazaqstannyń ıÝNESKO jáne ISESKO isteri jónindegi ulttyq komıssııasynyń tóraǵasy Erlan Qarın Ózbekstan Respýblıkasynyń Samarqand qalasynda ótip jatqan Birikken Ulttar Uıymynyń Bilim, ǵylym jáne mádenıet máseleleri jónindegi Bas konferentsııasynyń (ıÝNESKO) 43-shi sessııasynda sóz sóıledi, dep habarlaıdy Aqordanyń baspasóz qyzmeti.
Memlekettik keńesshi óz baıandamasynda Qazaqstan Prezıdenti Qasym-Jomart Toqaevtyń BUU Bas Assambleıasynyń 80-shi sessııasynda senimge, ashyqtyqqa, jaýapkershilik pen ádildikke negizdelgen jańa jahandyq konsensýsty qalyptastyrýǵa shaqyrǵanyn atap ótti. Osy oraıda ol ıÝNESKO-nyń mańyzy arta túskenin aıtyp, Islam áleminiń bilim, ǵylym jáne mádenıet uıymymen (ICESCO) halyqaralyq yntymaqtastyqty nyǵaıtýǵa shaqyrdy.
– ıÝNESKO men ICESCO ortaq maqsattardy kózdeıdi. Eki uıymnyń yntymaqtastyǵyn nyǵaıtý mádenıetter arasynda shynaıy seriktestik qurýǵa jáne olardyń oń áserin odan ári arttyrýǵa múmkindik beredi. Birlesken kúsh-jigerdiń nátıjesinde ǵana ortaq mádenı muramyzdyń bar baılyǵy men ártúrliligin saqtaıtynymyzǵa senimdimiz. Biz birlesip ádil, sanaly ári meıirimdi álemdi quratyn bolamyz, – dedi ol.
Memleket basshysynyń bıylǵy Joldaýynda aıtylǵan Qazaqstandy odan ári jańǵyrtýdyń jańa qadamdary E.Qarın baıandamasynyń negizgi ózegi boldy. Bul eń aldymen ekonomıkanyń túrli salalaryna jasandy ıntellektini jappaı engizý jáne tsıfrlandyrýdy keń kólemde damytýdy qamtıdy. Qazaqstan bolashaqta tehnologııalyq turǵydan damyǵan memleket atanýdy kózdeıdi.
– Qazaqstan tsıfrlandyrý men jasandy ıntellekt quraldaryn jedeldetip engizýde keshendi ári júıeli sheshimder qabyldaǵan álemdegi alǵashqy elderdiń biri bolyp otyr. Qazaqstan Prezıdenti tsıfrlyq transformatsııa men jasandy ıntellektini engizýdi jańa ulttyq ıdeıa retinde aıqyndap berdi, – dedi Erlan Qarın.
Osy oraıda Memlekettik keńesshi ıÝNESKO-nyń jasandy ıntellekt etıkasyn qalyptastyrýdaǵy jetekshi rólin qoldaıtynyn jetkizdi. Sondaı-aq Qazaqstanda ıÝNESKO (RAM) ádistemesine sáıkes jasandy ıntellekt etıkasy men ony damytý jóninde zertteý júrgizilip jatqanyn habarlady.
Buǵan qosa Erlan Qarın Joldaýda jarııalanǵan bir palataly Parlamentke kóshýdi ári ony proportsıonaldy júıe boıynsha qalyptastyrýdy kózdeıtin saıası jańǵyrtý úderisiniń maqsattary men sıpaty týraly aıtty.
– Qazaqstandaǵy Parlamenttik reformanyń maqsaty – saıası júıeniń ınstıtýtsıonaldyq negizderin odan ári nyǵaıtý. Nátıjesinde partııalardyń róli kúsheıip, qoǵamdyq-saıası úderisterge qatysýy artady. Jalpy, Parlamenttik reforma Qazaqstandaǵy saıası jańǵyrýdyń kezekti kezeńi bolyp sanalady, – dedi Memlekettik keńesshi.
Bas konferentsııaǵa Uıymnyń 193 múshe memleketinen delegatsııalar qatysýda, onyń ishinde úkimet basshylary, mınıstrler, ǵalymdar men mádenıet qaıratkerleri, dıplomattar, sarapshylar jáne basqalar bar.