Memlekettik keńesshi Tarıhshylardyń ulttyq kongresiniń forýmyna qatysty
ASTANA. KAZINFORM — Otandyq ǵalymdar Qazaqstan tarıhyna qatysty jańa akademııalyq kóptomdyq basylym ázirlep jatyr. Bul týraly elordada Memlekettik keńesshi Erlan Qarınniń qatysýymen ótken Qazaqstan tarıhshylary ulttyq kongresiniń forýmynda aıtyldy. Bul týraly 24.kz jazdy.
Alqaly jıynda elimizdegi ǵylymı qaýymdastyqtyń 300 ókili bas qosty. Sharaǵa tarıhshy-zertteýshiler, joǵary oqý oryndarynyń oqytýshylary men qoǵam qaıratkerleri jınaldy.
Forýmda arheologııa, etnografııa, etnologııa, tarıhı geografııa salalaryndaǵy jańalyqtardy taldaý, júıeleý jáne ǵylymı aınalymǵa engizý máseleleri talqylandy. Oǵan qosa, Qazaqstan zertteýshileriniń shetel muraǵattarynda, mýzeıleri men kitaphana qorlarynda júrgizgen jumys nátıjeleri qaraldy.
— Arheologııanyń mysalynda aıtatyn bolsaq, sońǵy 25 jylda kóptegen jańa ashylymdar ashyldy. Tarıhymyzdy tolyǵymen qaıta qaraýǵa májbúr etedi. Arheologııa pánaralyq úlken ǵylymǵa aınaldy. Jaratylystaný ǵylymdarynyń ádistemelerin paıdalana otyryp, jańasha aqparattyń bárin alyp jatyrmyz. Ejelgi qoǵam týraly, onyń paleoekonomıkasy týraly, sharýashylyǵy týraly, dúnıetanymy týraly burynǵy tarıhymyzdy tolyǵymen qaıta qaraýǵa múmkindigimiz bar, - deıdi Á.Marǵulan atyndaǵy arheologııa ınstıtýtynyń bas dırektory Aqan Ońǵaruly.
Jıynda «Qazaqstan tarıhy: ejelgi dáýirden búginge deıin» atty jańa akademııalyq basylymdy daıyndaý barysy talqylandy. Bul jobaǵa bes ǵylymı zertteý ınstıtýty men elimizdiń 250-den astam ǵalymy jumyldyrylǵan. Memlekettik keńesshi óz sózinde Tarıhshylardyń ulttyq kongresi elimizdegi tarıh ǵylymyn damytý turǵysynan mańyzy zor ekendigin aıtty. Oǵan qosa, sońǵy jyldary ǵylymı aınalymǵa engen arheologııalyq oljalar men arhıvtik qujattar ult tarıhyn birtutas ári keń aýqymda qabyldaýǵa jol ashatyndyǵyn atap ótti.
— Qazaqstan — kóshpendilerdiń ejelgi memlekettik qurylymdarynyń besigi jáne bir kezdegi qýatty elder men ımperııalardyń murageri ǵana emes, sonymen qatar tutas kóshpendiler órkenıetiniń oshaǵy men ortalyǵy. Sondyqtan ulttyq tarıh ǵylymynyń mindeti — halqymyzdyń tarıhyna órkenıettik paradıgma turǵysynan aýqymdyraq jáne keńirek qaraý, ony osy ustanym boıynsha dáripteý, — dedi QR Memlekettik keńesshisi Erlan Qarın.
Forýmǵa qatysýshylar ejelgi dáýirden búginge deıingi Qazaqstan tarıhyna qatysty kóptomdyq akademııalyq basylymdy ázirleý jumystaryna joǵary baǵa berdi. Sondaı-aq arheologııalyq jáne tarıhı-mádenı eskertkishterdi zertteý aýqymyn keńeıtý, muraǵat pen aımaqtaný isin odan ári damytý, oqýlyqtardy jáne tarıhty oqytý ádistemesin jetildirý syndy túıtkilderge toqtaldy.