Memlekettik keńesshi Sybaılas jemqorlyqqa qarsy is-qımyl máseleleri jónindegi komıssııasynyń otyrysyn ótkizdi
ASTANA. KAZINFORM – Memlekettik keńesshi Erlan Qarınniń tóraǵalyǵymen Qazaqstan Respýblıkasy Prezıdentiniń janyndaǵy Sybaılas jemqorlyqqa qarsy is-qımyl máseleleri jónindegi komıssııanyń otyrysy ótti.
Basqosýda Kóleńkeli ekonomıkaǵa qarsy is-qımyl jónindegi is-sharalardyń 2023-2025 jyldarǵa arnalǵan keshendi josparyn júzege asyrý barysy qaraldy.
Otyrysta Memleket basshysynyń «Ádiletti Qazaqstan: bárimiz jáne árqaısymyz úshin. Qazir jáne árdaıym» atty saılaý aldyndaǵy baǵdarlamasynda kóleńkeli ekonomıka deńgeıin tómendetý mindeti qoıylǵany aıtyldy.
Bul baǵdarlamany iske asyrý jáne baqylanbaıtyn ekonomıkaǵa qarsy is-qımyl aıasynda jumysty júıeli túrde jalǵastyrýdy qamtamasyz etý úshin Úkimettiń byltyr 2023-2025 jyldarǵa arnalǵan jańa keshendi jospardy bekitkeni atap ótildi.
Naqty aıtqanda, qujat munaı jáne munaı ónimderiniń, dári-dármektiń, tsıfrlyq aktıvterdiń aınalymy sııaqty baǵyttarǵa qatysty is-sharalarmen tolyqtyryldy.
Osy másele boıynsha Qarjy monıtorıngi agenttigi, Qarjy, Ulttyq ekonomıka, Saýda jáne ıntegratsııa mınıstrlikteri, «Samuryq-Qazyna» AQ basshylarynyń baıandamalary tyńdaldy.
Memlekettik keńesshi Keshendi josparda qarastyrylǵan is-sharalardy sapaly oryndaýdyń, negizgi kórsetkishterge qol jetkizýdiń, tájirıbeni eskerip, kóleńkeli qyzmetke beıim basqa salalardy anyqtaýdyń jáne qabyldanyp jatqan sharalardy jańartyp otyrýdyń mańyzdylyǵyn erekshe atap ótti.
Memlekettik organdar men mekemelerge jospardaǵy tıisti sharalardy tolyq oryndaý týraly tapsyrma berildi.
Jıyn barysyndaǵy talqylaýdy eskere otyryp, Komıssııa naqty usynymdar ázirledi. Otyrysty qorytyndylaı kele, Memlekettik keńesshi birqatar tapsyrma berdi jáne onyń oryndalýy baqylaýǵa alyndy.
