Memlekettik keńesshi sybaılas jemqorlyqqa qarsy kúreste halyqaralyq seriktestiktiń mańyzyn atap ótti
ASTANA.KAZINFORM - Memlekettik keńesshi Erlan Qarınniń tóraǵalyǵymen Qazaqstan Respýblıkasy Prezıdenti janyndaǵy Sybaılas jemqorlyqqa qarsy is-qımyl máseleleri jónindegi komıssııanyń otyrysy ótti. Bul týraly Aqordanyń baspasóz qyzmeti habarlady.
Jıynda 2022-2026 jyldarǵa arnalǵan Jemqorlyqqa qarsy saıasat tujyrymdamasynyń júzege asyrylý barysy qarastyrylyp, Jemqorlyqqa qarsy kúres memleketter tobynyń (GREKO) usynymdary pysyqtaldy.
Otyrysta Memlekettik qyzmet isteri agenttigi, Qarjy mınıstrligi, Eńbek jáne halyqty áleýmettik qorǵaý mınıstrligi basshylarynyń baıandamalary tyńdaldy.
Memlekettik keńesshi sybaılas jemqorlyqqa qarsy is-qımyldy jetildirý baǵytynda qabyldanyp jatqan sharalardyń mańyzyna toqtalyp, birqatar oń ózgeriske nazar aýdardy.
Jemqorlyqqa qarsy saıasat tujyrymdamasyn júzege asyrý aıasynda Prezıdenttiń eki Jarlyǵy, on zań jáne Úkimet qaýlysy, memlekettik organdardyń júzge jýyq buıryǵy qabyldandy. Bul sharalar elimizde júrgizilip jatqan sybaılas jemqorlyqqa qarsy saıasatty ózektendirýge jáne jemqorlyqtyń aldyn alýdyń tıisti tetigin qalyptastyrýǵa múmkindik berdi.
Erlan Qarın Tujyrymdamany iske asyrý merzimi aıaqtalýǵa taıap qalǵanyn, sybaılas jemqorlyqqa qarsy is-qımyl salasynda jańa baǵdarlamalyq qujatty ázirleý jumystaryn bastaý kerek ekenin eske saldy. Bul rette qazirgi jaǵdaıǵa taldaý júrgizý, halyqaralyq ozyq tájirıbeni jáne zamanaýı úrdister men syn-qaterlerdi eskerý mańyzdy.
Sondaı-aq Memlekettik keńesshi sybaılas jemqorlyqqa qarsy kúreste halyqaralyq seriktestiktiń, sonyń ishinde GREKO uıymymen ózara yntymaqtastyqty keńeıtýdiń mańyzy zor ekenin atap ótti.
Jıyn sońynda Erlan Qarın «Zań jáne tártip» qaǵıdatyn odan ári ornyqtyra túsý sybaılas jemqorlyqqa qarsy baǵdarlamalardy iske asyrýdaǵy mańyzdy baǵyt ekenin jetkizdi.
Aıta keteıik, elimizde Sybaılas jemqorlyqqa qarsy jańa standart bekitildi.