Memlekettik keńesshi ishki saıasat máseleleri jóninde kezekti respýblıkalyq keńes ótkizdi
ASTANA. KAZINFORM — Memleket basshysynyń ishki saıasattyń negizgi qaǵıdattary, qundylyqtary men baǵyttary jónindegi Jarlyǵyn iske asyrý aıasynda Aqordada Erlan Qarınniń tóraǵalyǵymen respýblıkalyq keńes ótti.
Jıynǵa Úkimet músheleri, Prezıdent Ákimshiliginiń qurylymdyq bólimsheleriniń basshylary, oblystar men respýblıkalyq mańyzy bar qalalar ákimderiniń orynbasarlary, óńirlik basqarmalardyń jetekshileri qatysty.
Memlekettik keńesshi Prezıdent Jarlyǵymen alǵash ret ishki saıasattyń negizgi baǵyttary, maqsattary men mindetteri memlekettik deńgeıde qalyptastyrylyp, júıelengenin atap ótti. Erlan Qarınniń aıtýynsha, bul qujat ishki saıasat salasyndaǵy memlekettik organdardyń jumysyn tıimdi úılestirýge baǵyttalǵan. Sonymen qatar júrgizilip otyrǵan memlekettik saıasattyń ıdeıalyq mánin naqty túsindirýge múmkindik beredi.
Sondaı-aq Memlekettik keńesshi jańa Konstıtýtsııa jobasynyń mańyzyna toqtaldy.
— Alǵash ret Ata Zańnyń preambýlasynda jáne alǵashqy baptarynda memlekettiligimizdiń irgeli negizderi — Táýelsizdik pen Egemendik, sondaı-aq, memlekettiń negiz quraýshy qaǵıdattary erekshe bekitildi. Osylaısha, jańa Ata Zańda negizgi quqyqtyq normalar men qujattar ǵana emes, bizdiń qoǵamnyń basty maqsattary men baǵdarlary da ornyqty. Negizgi Zań jobasynyń ıdeıalyq-qundylyq turǵysynan alǵandaǵy mańyzy zor. Eger basty qujat referendýmda qabyldanyp jatsa, jańa Konstıtýtsııa qoǵam tutastyǵynyń sapaly ári jańa deńgeıdegi platformasyna aınalady, — dedi Erlan Qarın.
Keńes barysynda Prezıdenttiń Ulttyq quryltaıdyń Qyzylordada ótken besinshi otyrysynda bergen tapsyrmalaryn oryndaý, sonymen qatar ultaralyq jáne konfessııaaralyq kelisimdi nyǵaıtý, qoǵamdyq birlestiktermen jáne sarapshylarmen qarym-qatynas jasaý, mádenı-gýmanıtarlyq, aqparattyq, otbasylyq jáne jastar saıasatyn júrgizý máseleleri qaraldy.
Keńes qorytyndysy boıynsha jaýapty memlekettik organdarǵa ishki saıasat salasyndaǵy jumystyń negizgi baǵyttaryn naqty júzege asyrý boıynsha tıisti tapsyrmalar berildi.
Osyǵan deıin Qarın jańa Ata zańdy «halyqtyq Konstıtýtsııa» dep aıtýǵa tolyq negiz bar ekenin aıtty.