Memlekettik keńesshi ishki saıasat máseleleri jóninde kezekti respýblıkalyq keńes ótkizdi
ASTANA. KAZINFORM - Memlekettik keńesshi Erlan Qarınniń tóraǵalyǵymen ishki saıasat máseleleri jóninde respýblıkalyq keńes ótti. Jıynǵa Úkimet músheleri, Prezıdent Ákimshiliginiń qurylymdyq bólimderiniń basshylary, oblystar men respýblıkalyq mańyzy bar qalalar ákimderiniń orynbasarlary, óńirlik basqarmalardyń jetekshileri qatysty.
Erlan Qarın keńeste sóılegen sózinde Konstıtýtsııanyń kúshine enýimen Qazaqstan tarıhynyń jańa dáýiri bastalatynyn, elimiz jańa, zamanaýı ári serpindi memlekettik-saıası modelge kóshetinin atap ótti.
Memlekettik keńesshi jańa damý kezeńiniń basty ereksheligi qoǵamdyq úderisterdiń jańǵyrýynda, jańa qoǵamdyq kúshter men jańa tulǵalardyń qalyptasýynda ekenin aıtty. Sol sebepti júrgizilip jatqan reformalar men ózgerister aýqymy jáne mańyzy jaǵynan sońǵy onjyldyqtardaǵy eń iri qoǵamdyq-saıası úderisterdiń biri sanalady.
Sonymen qatar Erlan Qarın Prezıdent bastamasymen júzege asyrylyp jatqan jańarýlar men jańǵyrýlardyń mán-mańyzyna toqtaldy.
-Qoǵam reformalar men ózgeristerdiń nátıjeliligin, qajettiligi men mańyzyn naqty sezinip otyr. Bul óz kezeginde Memleket basshysy strategııasynyń aınalasyna toptasýshy azamattar sanynyń arta túsýine jol ashty. Muny Prezıdent Qasym-Jomart Toqaevqa degen qoǵamdyq senim reıtınginiń joǵary, ıaǵnı, 86,7 paıyz bolýy dáleldep otyr. Reformalardyń nátıjesin basqa da áleýmettik saýalnamalar qýattaı túsýde. Olardaǵy statıstıkalyq derekterge súıensek, azamattardyń 84 paıyzdan astamy Qazaqstan durys baǵytta damyp keledi dep esepteıdi. Biraq qol jetkizilgen nátıjelermen shektelip, qarqyndy báseńdetpeı, árdaıym alǵa umtylý kerek. Bizdiń basty mindetimiz – azamattardyń suranystaryna der ýaqytynda ári laıyqty jaýap berý, jasampaz kún tártibi men jańa konstıtýtsııalyq qundylyqtardy ilgeriletý, Prezıdent bastamalarynyń sapaly iske asyrylýyn qamtamasyz etý, – dedi Erlan Qarın.
Keńes barysynda jańa konstıtýtsııalyq qaǵıdattardy ornyqtyrý, ultaralyq jáne konfessııaaralyq kelisimdi nyǵaıtý, qoǵamdyq birlestiktermen jáne sarapshylarmen baılanysty jandandyrý, mádenı-gýmanıtarlyq, aqparattyq, otbasy jáne jastar saıasaty máseleleri qaraldy.
Keńes qorytyndysy boıynsha jaýapty memlekettik organdarǵa ishki saıasat salasyndaǵy jumystyń negizgi baǵyttaryn naqty júzege asyrý boıynsha tıisti tapsyrmalar berildi.
Sońǵy 8 jylda Qazaqstan azamattyǵynan shyǵýǵa ótinish bergender sany 40 esege jýyq azaıdy.
