Memlekettik keńesshi sarapshylarmen birge ishki saıasat máseleleri jóninde jıyn ótkizdi

ASTANA. KAZINFORM — Erlan Qarın sarapshylarmen birge ishki saıasat máseleleri jónindegi jıyn ótkizdi, dep habarlaıdy Aqordanyń baspasóz qyzmeti.

Basqosýdy Qazaqstannyń strategııalyq zertteýler ınstıtýty uıymdastyrdy.

Kezdesýge Andreı Chebotarev, Alýa Joldybalına, Talǵat Qalıev, Aıgúl Sádýaqasova, Nıkıta Shatalov, Qarlyǵash Jamanqulova, Ǵazız Ábishev, Aıgúl Zabırova, Nurbek Matjanı, Janar Sanhaeva, Ámına Úrpekova sekildi belgili saıasattanýshylar men áleýmettanýshylar qatysty.

Jıynda Memleket basshysy Qasym-Jomart Toqaevtyń bıyl naýryz aıynda Býrabaıda ótken Ulttyq quryltaıdyń IV otyrysynda kótergen bastamalaryn júzege asyrý joldary men tásilderi talqylandy.

— Basqosýda ishki saıasat salasyna qatysty birtutas keshendi qujatty daıarlaý úderisine basa nazar aýdaryldy. Qujattyń negizgi jobasyn Qazaqstannyń strategııalyq zertteýler ınstıtýty ázirlegenin atap ótýimiz kerek. Buǵan qosa atalǵan jumysqa Ulttyq quryltaıdyń músheleri de atsalysty. Pikir almasý barysynda Memlekettik keńesshi ishki saıasat salasyna qatysty keshendi qujatty daıyndaý jáne qabyldaý, túptep kelgende, memlekettik organdar qyzmetin júıeleý jolyndaǵy aýqymdy istiń bir bóligi ekenin atap ótti. Qujatta ishki saıasat salasyndaǵy negizgi qaǵıdattar, tujyrymdar jáne baǵyttar retke keltiriledi, — delingen habarlamada.

Sarapshylar óz kezeginde atalǵan qujattyń memlekettik organdar qyzmetine baǵdar berip qana qoımaı, azamattyq qoǵam ókilderi men sarapshylar úshin ishki saıasat salasyndaǵy negizgi basymdyqtar jóninde aıqyn túsinik qalyptastyratynyna nazar aýdardy.

Jıynǵa qatysýshylar qujat jobasyn jetildirýge jáne tolyqtyrýǵa qatysty oılary men usynystaryn ortaǵa saldy.

Keshendi qujat jobasyn talqylaýǵa arnalǵan mundaı kezdesýler aldaǵy ýaqytta da uıymdastyrylady.

Osyǵan deıin Erlan Qarın balalardyń qaýipsizdigin qamtamasyz etýge qatysty jıyn ótkizgenin jazdyq.