Erlan Qarın robot tehnıkasynan álem chempıony bolǵan oqýshylarmen kezdesti

ASTANA. KAZINFORM - Erlan Qarın robotty tehnıkadan álemniń úsh dúrkin jeńimpazy atanǵan mektep oqýshylarymen júzdesti, dep habarlaıdy Aqordanyń baspasóz qyzmeti. 

Kezdesýge Qazaqstan komandasynyń músheleri, Almaty qalasyndaǵy fızıka-matematıka baǵytyndaǵy Nazarbaev zııatkerlik mektebiniń oqýshylary Erdáýlet Túrgenbaev, Álfııa Baıjaqyp, Nurjan Kókeev, Dosjan Daıran jáne Qadylbek Dastan, sondaı-aq olardyń ustazdary Asylbek Myrzahmetov pen Nurdáýlet Dosmaǵambet qatysty.

Memlekettik keńesshi daryndy oqýshylar men olardyń ustazdaryn jaqynda Grekııada robotty tehnıkadan ótken FIRST Global Challenge dep atalatyn aýqymdy chempıonattaǵy kezekti jeńisimen quttyqtady.

Oqýshylar men ustazdar chempıonatqa daıyndyq barysy jáne ony ótkizýdiń erekshelikterine toqtalyp, aldaǵy josparlarymen bólisti.

FIRST Global Challenge – 2017 jyldan beri ártúrli memlekette ótkizilip kele jatqan robotty tehnıkadan olımpıadalyq úlgidegi álem chempıonaty. Qazaqstannyń qurama komandasy 2022 jyly Jenevada jáne 2023 jyly Sıngapýrde ótken jarysta top jardy.

Sonymen birge bizdiń komandanyń quramy ár básekede tolyq jańartylyp, ulttyq kezeńniń jeńimpazdarynan jasaqtaldy.

Bıyl oqýshylarymyz 190 eldiń myqtylary baq synaǵan dúbirli dodada qatarynan úshinshi ret jeńimpaz atandy.