Prezıdent atynan Zeınep Ahmetovaǵa Altyn juldyz ben «Otan» ordeni tabystaldy

ASTANA. KAZINFORM — Memlekettik keńesshi Prezıdent atynan «Halyq qaharmany» Baýyrjan Momyshulynyń týystaryna Altyn juldyz ben «Otan» ordenin tapsyrdy. Bul týraly Aqorda málim etti. 

2025 jyldyń sońynda Memleket basshysy Qasym-Jomart Toqaev Jambyl oblysyna jasaǵan jumys sapary kezinde aty ańyzǵa aınalǵan batyr Baýyrjan Momyshulyna «Halyq qaharmany» ataǵyn berý týraly sheshimin jarııalap, tıisti Jarlyqqa qol qoıǵan bolatyn.

Memlekettik keńesshi Erlan Qarın Almatyda Uly Otan soǵysynda erlik pen batyldyq kórsetken Baýyrjan Momyshulynyń kelini Zeınep Ahmetova men nemeresi Erjan Momyshulyna Prezıdent atynan aıryqsha erekshelik belgisi – Altyn juldyz ben «Otan» ordenin tapsyrdy.

– Halqymyz Baýyrjan Momyshulyn árdaıym batyr dep biledi, qaharman dep qasterleıdi. Memleket basshysy Qasym-Jomart Toqaevtyń bul jolǵy sheshimi halyqtyń oǵan degen ystyq yqylasyn odan ári arttyra tústi. Eń bastysy, kópten kútken tarıhı ádildik qalpyna keltirildi, – dedi Memlekettik keńesshi.

Sondaı-aq Erlan Qarın qaısar rýh pen ór minezdiń sımvolyna aınalǵan Baýyrjan Momyshulynyń ómiri jas urpaqqa úlgi-ónege ekenin atap ótti.

Aıta keteıik, jaqynda Baýyrjan Momyshulyna «Halyq qaharmany» ataǵy berildi.

Qorǵanys mınıstrliginiń áskerı ushqyshtar oqý-jattyǵý ushýlaryn dańqty qolbasshy Baýyrjan Momyshulyna arnaǵan edi.