Memlekettik keńesshi Parlament Májilisindegi fraktsııa jetekshilerimen kezdesti
ASTANA. KAZINFORM — Memlekettik keńesshi Erlan Qarın Parlament Májilisindegi alty saıası partııanyń fraktsııa jetekshilerimen kezdesý ótkizdi. Bul týraly Aqorda málim etti.
Basqosýǵa «Amanat» partııasy fraktsııasynyń jetekshisi Elnur Beısenbaev, «Aýyl» HDPP fraktsııasynyń jetekshisi Serik Egizbaev, «Respublica» partııasy fraktsııasynyń jetekshisi Aıdarbek Qojanazarov, «Aq jol» QDP fraktsııasynyń jetekshisi Azat Perýashev, QHP fraktsııasynyń jetekshisi Magerram Magerramov, JSDP fraktsııasynyń jetekshisi Ashat Rahymjanov jáne Prezıdenttiń Parlamenttegi Ókildiginiń basshysy Ámirbek Ospanbekov qatysty.
Erlan Qarın Prezıdent Qasym-Jomart Toqaevtyń Parlament palatalarynyń birlesken otyrysynda jarııalaǵan Joldaýyndaǵy negizgi bastamalarǵa nazar aýdardy. Al fraktsııa jetekshileri Joldaýdyń oryndalýyn baqylaý jáne zańnamalyq turǵydan qamtamasyz etý baǵytyndaǵy jumys jospary jóninde málimet berdi.
Jıynǵa qatysýshylar Memleket basshysynyń Joldaýda usynǵan parlamenttik reformasy týraly pikir almasty. Memlekettik keńesshi Prezıdenttiń jańa saıası bastamasy, eń aldymen, saıası júıeniń ınstıtýtsıonaldyq negizderin odan ári nyǵaıtýǵa baǵyttalǵanyn atap ótti. Fraktsııa jetekshileri Prezıdenttiń Parlamentti reformalaý jónindegi usynysyna qoldaý bildirip, aldaǵy qoǵamdyq talqylaýlarǵa belsene qatysýǵa daıyn ekenin jetkizdi.
Sondaı-aq Memlekettik keńesshi Prezıdenttiń Ulttyq quryltaıdyń IV otyrysynda bergen tapsyrmalaryn oryndaý aıasynda ázirlenip jatqan zań jobalaryn talqylady.
Kezdesý sońynda Erlan Qarın Prezıdent bastamalaryn iske asyrýǵa zańnamalyq turǵydan belsendi qoldaý kórsetkeni úshin partııalyq fraktsııalarǵa alǵys aıtyp, aldaǵy ýaqytta da osyndaı tıimdi yqpaldastyq bolatynyna senim bildirdi.
Aıta keteıik, buǵan deıin Erlan Qarın Tsıfrlyq transformatsııa men jasandy ıntellekt ulttyq strategııaǵa biriktiriletinin aıtqan edi.