Memlekettik keńesshi Parlament Májilisi fraktsııalarynyń jetekshilerimen kezdesti

ASTANA. KAZINFORM — Memlekettik keńesshi Erlan Qarın Parlament Májilisindegi alty saıası partııanyń fraktsııa jetekshilerimen kezdesý ótkizdi.

Jıynǵa «Amanat» partııasy fraktsııasynyń jetekshisi Elnur Beısenbaev, «Aýyl» partııasy fraktsııasynyń jetekshisi Serik Egizbaev, «Respublica» partııasy fraktsııasynyń jetekshisi Aıdarbek Qojanazarov, «Aq jol» Qazaqstan demokratııalyq partııasy fraktsııasynyń jetekshisi Azat Perýashev, Qazaqstan Halyq partııasy fraktsııasynyń jetekshisi Magerram Magerramov, Jalpyulttyq sotsıal-demokratııalyq partııasy fraktsııasynyń jetekshisi Ashat Raqymjanov, sondaı-aq Prezıdenttiń Parlamenttegi ókildiginiń basshysy Ámirbek Ospanbekov qatysty.

Kezdesý barysynda Erlan Qarın Memleket basshysynyń Ulttyq quryltaı aıasyndaǵy bastamalaryn júzege asyrýǵa belsendi qoldaý kórsetkeni úshin partııalardyń fraktsııalaryna alǵys aıtty. Atyraýdaǵy Quryltaıda aıtylǵan usynystardy júzege asyrý úshin 9 zań qabyldandy. Olardyń qatarynda áıelderdiń quqyqtaryn, balalardyń qaýipsizdigin qamtamasyz etý; veıpterge, shegýge kelmeıtin temeki ónimderine tyıym salý jónindegi zańdar; sondaı-aq memlekettik nagradalarǵa; onomastıkaǵa; nyshandardyń biryńǵaı standartyna; oıyn bıznesi, lotereıa jáne lotereıa qyzmeti máselelerine; vandalızmge jáne tabıǵı nysandardy qorǵaýǵa; qurmetti ataqtarǵa; esirtki ónimderimen aınalysatyn adamdardyń, sonymen qatar ony jasyryn jetkizýshilerdiń jaýapkershilik jigin bólýge qatysty túzetýler men tolyqtyrýlar bar.

Memlekettik keńesshi atalǵan zańdar ishki saıasatqa baılanysty jumystyń tıimdiligin arttyrýda mańyzdy ról atqaratynyn atap ótti.

Sondaı-aq jıynǵa qatysýshylar Memleket basshysynyń «Ana tili» gazetinde jaryq kórgen suhbatynda aıqyndaǵan ishki saıasat salasyndaǵy bıylǵy jumystyń baǵyt-baǵdary týraly pikir almasty.