Memlekettik keńesshi Konstıtýtsııalyq komıssııanyń jumysyna qatysty pikir aıtty

ASTANA. KAZINFORM — Asa mańyzdy máselelerdi emotsııamen emes, aqylmen taldap otyrǵanymyz abzal. Bul týraly búgin Konstıtýtsııalyq reforma jónindegi komıssııanyń jetinshi otyrysynda Memlekettik keńesshi Erlan Qarın málim etti.

— Konstıtýtsııalyq komıssııa jumysynyń úlken artyqshylyǵy — ol komıssııa alǵashqy kúnnen bastap ashyq formatta ótip jatyr. Barlyq otyrys tikeleı efırde kórsetilip keledi. Sondyqtan osy minberde aıtylyp jatqan pikirlerdi halyq birden estip otyr. Ár komıssııanyń otyrysynda qoǵam tarapynan qandaı da bir suraq bolsa, birden jaýap berip, keri baılanysty qamtamasyz etip otyrmyz. Meniń oıymsha, Konstıtýtsııalyq komıssııa jumysynyń úlken artyqshylyǵy osynda, — dedi E. Qarın.

Osy oraıda ol aldaǵy komıssııa otyrystarynda dál mundaı formatta jumysty uıymdastyrý kerek ekenin atap ótti.

— Komıssııanyń tıimdi tustaryn osy baǵytta paıdalaný qajet. Eń bastysy, asa mańyzdy eldik máselelerdi emotsııamen emes, aqylmen taldap otyrǵanymyz abzal, — dedi Memlekettik keńesshi. 

Budan buryn habarlanǵandaı, búgin Konstıtýtsııalyq reformalar jónindegi komıssııanyń otyrysynda Erlan Qarın jańa preambýlada memlekettik shekarasy men aýmaqtyq tutastyǵyna qol suǵylmaıtyny anyq jazylǵanyn aıtty.