Qazaqstan saıası ómirdiń joǵary dınamıkasy men ilgerileýge degen umtylysyn kórsetip otyr – Erlan Qarın
ASTANA. KAZINFORM – Qazaqstan Respýblıkasynyń Memlekettik keńesshisi Erlan Qarın jańa Konstıtýtsııa boıynsha ótip jatqan jalpyhalyqtyq referendýmda daýys berdi. Ol óz tańdaýyn elordadaǵy Ulttyq akademııalyq kitaphanadaǵy №129 ýchaskede jasady.
– Búgingi referendým konstıtýtsııalyq reforma boıynsha jarty jyldan astam ýaqytqa sozylǵan qoǵamdyq talqylaýlardyń qorytyndysyn shyǵarady. 189 kún boıy ótken talqylaýǵa myńdaǵan azamattar, sarapshylar men qoǵam belsendileri qatysty. Osy kezeńde biz qoǵamdaǵy belsendilikti jáne azamattardyń keńinen qatysqanyn kórdik, – dedi Erlan Qarın.
Sonymen qatar Memlekettik keńesshi bul referendým negizinen Qazaqstannyń bolashaǵyn aıqyndaıtynyn atap ótti. Onyń aıtýynsha, búgin azamattar qandaı qoǵam quratynymyzdy, elimizdiń qandaı qundylyqtar men qaǵıdattar negizinde damıtynyn sheshedi.
– Eske salaıyn, bul – sońǵy tórt jyldaǵy úshinshi referendým. Prezıdenttiń mańyzdy ári negizgi sheshimder referendým arqyly, ıaǵnı barlyq azamattyń pikirin eskere otyryp qabyldanýy kerek degen qaǵıdaty elimizdiń saıası ómirindegi qalypty ári ornyqqan tájirıbege aınaldy, – dedi ol.
Sondaı-aq ol óz sózinde sońǵy jyldary Qazaqstan ashyq dıalog júrgizý jáne memleket pen qoǵamnyń birlesip sheshim qabyldaýy turǵysynan barshaǵa úlgi kórsetip kele jatqanyn aıtty. Bizdiń elimiz saıası ómirdiń joǵary serpinin jáne damýǵa umtylysyn kórsetip otyr, dedi ol.
Memlekettik keńesshi buǵan deıin Konstıtýtsııalyq komıssııanyń XII otyrysynda zańgerler men til mamandarynyń birlesken jumysynyń nátıjesinde jańa Ata zań mátini oqýǵa jeńil, túsinýge ońaı ári quqyqtyq turǵydan naqty qujatqa aınalǵanyn atap ótken bolatyn.
Aıta keteıik, Qazaqstan úlken saıası ózgerister qarsańynda tur. Jalpyhalyqtyq referendým eldiń damý baǵytyn aıqyndaıtyn mańyzdy qadam retinde qarastyrylyp otyr. Osy oraıda elorda turǵyndary da óz tańdaýyn jasap, el bolashaǵyna beıjaı qaramaıtynyn bildirgen edi.
Ortalyq saılaý komıssııasynyń málimetinshe, daýys berýshiler referendým kúni tirkelgen jeri boıynsha ýchaskege baryp daýys beredi. Al eshqaıda tirkelmegen azamattarǵa daýys berý ýchaskesine bir táýlikke tirkelý múmkindigi qarastyrylǵan.
Búgin respýblıka boıynsha 10 myńnan astam daýys berý ýchaskesi jumys istep tur.