Memlekettik keńesshi: «Bılik qazaq tiline qııanat jasady» deý – bos áńgime

ASTANA. KAZINFORM – Memlekettik keńesshi Erlan Qarın jelidegi paraqshasynda qoǵamda talqyǵa túsken qazaq tiline qatysty pikir bildirdi.

- Kesheden beri áleýmettik jelilerde memlekettik tildiń mártebesine qatysty ártúrli pikir aıtylyp, qyzý talqynyń taqyrybyna aınalǵanyn kórip otyrmyz. Oı bólisken, kózqarasty ashyq bildirgen durys. Biraq «bılik qazaq tiline qııanat jasady» deý – bos áńgime, daýryqpa sóz. Attanǵa salyp, aıǵaıǵa basyp, joq jerden shý shyǵaratyndaı eshteńe bolǵan joq. Memlekettiń tilge qatysty ustanymy sol qalpy. Qazaq tilin elimizdegi etnosaralyq qatynas tiline aınaldyrýǵa qatysty baǵytynan aınymaı, óz arnasymen turaqty túrde jalǵasa beredi, - dep jazdy Erlan Tynymbaıuly.

Ol Assambleıa sessııasynda Prezıdenttiń osyny taǵy da anyq aıtqanyn atap ótti. Sonymen qatar qazaq tiliniń bolashaǵyna qatysty pessımıstik oıdan arylatyn ýaqyt jetkenin de málimdedi.

- Men muny buryn da aıtqanmyn, taǵy da qaıtalaǵym keledi. Kerisinshe, qazaq tiliniń qoǵamdaǵy róli jyl ótken saıyn artyp keledi. Eń bastysy, qazaq tili – jastardyń tiline aınaldy. Jas ǵalymdar, ónerpazdar, kásipkerler ana tilimizdi keńinen qoldanyp, óz baǵyttarynda barynsha damytyp jatyr. Demek «qazaq tiliniń bolashaǵy joq» dep aıtý eshqandaı qısynǵa kelmeıdi.Biraq bul jerde bir nárseni túsinýimiz kerek: memlekettik tildiń mártebesi «ur da jyq» ádispen óspeıdi. Qazaq tilin qalqan etip popýlıstik áreketpen aınalysýǵa bolmaıdy. Naǵyz tilge janashyr adam bulaı jasamaıdy. Jáne qazirgideı almaǵaıyp zamanda mundaı áreketter eldegi jaǵdaıǵa zııanyn tıgizýi múmkin, - delingen jazbada.

Erlan Qarın memlekettik tildiń mártebesin arttyrý naqty josparmen, júıeli jumyspen atqarylatynyn atap ótken.

- Sondyqtan týǵan tilimizdiń tamyryn tereńdetý isin aldaǵy ýaqytta da aqyl-parasatpen atqarýǵa tıispiz.

Sóz sońynda myna dúnıeni aıtqym keledi. Búginde elimizde tek qazaq tiline qatysty ǵana emes, jalpy ulttyq biregeılikti, ulttyq bolmysymyzdy dáripteıtin aýqymdy bastamalar qolǵa alynyp, júzege asyrylýda. Ulttyq merekemiz Naýryz jańasha sıpat alyp, ózgeshe atalyp jatyr. «Ulttyq kıim kúnin» qoǵam óte jyly qabyldady. Bıyl alǵash ret ótken «Ulttyq kitap kúni» de halqymyzǵa paıdaly bastamanyń biri bolmaq. Osylaı bári birte-birte retke keledi, - dep túsindiredi Memlekettik keńesshi.

Aıta keteıik, buǵan deıin Qazaqstanǵa kóship kelgen Joltaı men Ivanbek qazaq tilin qalaı tez úırengenin jazǵanbyz.