Memlekettik keńesshi Balalardyń quqyǵyn qorǵaý jóninde respýblıkalyq keńes ótkizdi
ASTANA. KAZINFORM — Erlan Qarınniń tóraǵalyǵymen Balalardyń quqyǵyn qorǵaý jóninde respýblıkalyq keńes ótti. Oǵan oblys ákimderiniń orynbasarlary qatysty. Bul týraly Aqorda málim etti.
Keńeste kámelet jasyna tolmaǵandarǵa baılanysty quqyq buzýshylyqtyń aldyn alý, balalardyń qaýipsizdigin tolyq qamtamasyz etý, sondaı-aq olardyń jazǵy demalystaryn uıymdastyrý máseleleri talqylandy. Sonymen qatar «Adal azamat» birtutas tárbıe berý baǵdarlamasyn júzege asyrý jáne ony mektepterge engizý barysy pysyqtaldy.
Basqosýda Oqý-aǵartý, Іshki ister, Tótenshe jaǵdaılar, Densaýlyq saqtaý mınıstrlikteriniń basshylary, Bas prokýrordyń orynbasary, Bala quqyqtary jónindegi ýákil jáne birqatar oblys ákiminiń orynbasarlary baıandama jasady.
Otyrysta balalardyń quqyqtaryn qorǵaýǵa jáne qaýipsizdigin qamtamasyz etýge qatysty máseleler men osy baǵytta qolǵa alynǵan sharalar týraly aıtyldy.
Memlekettik keńesshi búginde elimizde balalardyń quqyǵyn qorǵaý men qaýipsizdigin saqtaý boıynsha tıimdi ınstıtýtsıonaldyq jáne zańnamalyq júıe qalyptasqanyn atap ótti. Buǵan balalardyń quqyǵyn qorǵaýǵa jáne qaýipsizdigin qamtamasyz etýge aıryqsha mán beretin Memleket basshysynyń berik ustanymy zor yqpalyn tıgizdi.
Jıyn sońynda Erlan Qarın atalǵan baǵytta úılesimdi jumys isteýdiń, sondaı-aq oǵan ata-analar qaýymdastyǵyn tartýdyń mańyzyna toqtaldy. Memlekettik keńesshi balalar men jasóspirimderdiń qaýipsizdigin tolyq qamtamasyz etýdi jaýapty memlekettik organdar men oblys basshylyǵy júıeli túrde baqylaýda ustaýǵa tıis ekenin jetkizdi. Sondaı-aq balalardyń qaýipsizdigin qamtamasyz etý memlekettik organdar jumysynyń tıimdiligin aıqyndaıtyn negizgi kórsetkishtiń biri ekenine nazar aýdardy.
Eske sala keteıik, buǵan deıin QR Memlekettik keńesshisi Erlan Qarın Konstıtýtsııalyq reformanyń nátıjeleri týraly aıtqan edi.