Memlekettik keńesshi balalardyń qaýipsizdigin qamtamasyz etýge qatysty jıyn ótkizdi

ASTANA. KAZINFORM — Memlekettik keńesshi Erlan Qarınniń tóraǵalyǵymen balalardyń qaýipsizdigin qamtamasyz etý, kámeletke tolmaǵandarǵa qatysty quqyq buzýshylyqtardyń aldyn alý máselelerine arnalǵan jıyn ótti. Bul týraly Aqordanyń baspasóz qyzmeti málimdedi.

Basqosýǵa Oqý-aǵartý mınıstri Juldyz Súleımenova, Bas prokýrordyń birinshi orynbasary Jandos Ómirálıev, Bala quqyqtary jónindegi ýákil Dınara Zákıeva qatysty.

Jıynda Astana jáne Almaty qalalary, Aqtóbe, Jambyl, Qaraǵandy, Qostanaı, Qyzylorda oblystary ákimderiniń orynbasarlary baıandama jasap, balalar qaýipsizdigin qorǵaý salasyndaǵy ózekti máselelerge toqtaldy.

Erlan Qarın balalar quqyǵy men qaýipsizdigin qorǵaý ishki saıasat salasynyń basym baǵyty ári Memleket basshysynyń jiti nazaryndaǵy másele ekenin eske saldy.

Memlekettik keńesshi elimizde balalardyń quqyǵyn qorǵaý salasynda zańnamalyq jáne ınstıtýtsıonaldyq negizder qalyptasqanyn atap ótti. Sonymen qatar «Qazaqstan balalary» baǵdarlamasynyń jobasy aıasynda 100-den astam is-sharadan turatyn keshendi sharalar qarastyrylyp otyrǵanyn jetkizdi. Munyń barlyǵy balalar qaýipsizdigin qamtamasyz etý tásilderin jetildirýge baǵyttalǵan.

Erlan Qarın Oqý-aǵartý mınıstrligine atalǵan baǵyttaǵy jumysty utymdy úılestirip, birlesken is-qımyl sharalary men tásilderin ázirleýdi tapsyrdy.

Óńirler basshylyǵynyń qatysýymen mundaı jıyndar turaqty túrde uıymdastyrylady.

Budan buryn habarlanǵandaı, jańa oqý jylynyń basynan bastap elimizdiń barlyq balabaqshalarynda, mektepterinde jáne kolledjderinde 1,4 mln-nan astam «Jeke qaýipsizdik» sabaǵy ótkizildi.