Memlekettik keńesshi balalardyń qaýipsizdigin qamtamasyz etý máselesi jóninde jıyn ótkizdi
ASTANA. KAZINFORM - Aqordada Memlekettik keńesshi Erlan Qarınniń tóraǵalyǵymen balalardyń qaýipsizdigin qamtamasyz etý, jasóspirimderge qatysty quqyqbuzýshylyqtardyń aldyn-alý jáne onyń jolyn kesý máselelerine arnalǵan jıyn ótti, dep habarlaıdy Aqordanyń baspasóz qyzmeti.
Basqosýǵa Oqý-aǵartý, Mádenıet jáne aqparat mınıstrleri, Bas prokýratýra, Ulttyq qaýipsizdik komıteti, Іshki ister mınıstrligi, Prezıdent Ákimshiligi qurylymdyq bólimsheleriniń ókilderi jáne Bala quqyqtary jónindegi ýákil qatysty.
Jıynda balalardyń qaýipsizdigin qamtamasyz etý jáne quqyqtaryn qorǵaý, quqyq buzýshylyqqa qarsy is-qımyl, jasóspirimder arasyndaǵy sýıtsıdtiń aldyn alý jáne oǵan jol bermeý boıynsha júıeli ári jedel is-sharalardy júzege asyrý máseleleri qaraldy.
Erlan Qarın bul problemalar memlekettiń jiti nazarynda ekenin atap ótti. Memlekettik organdar qajetti ınstıtýtsıonaldyq sheshimder ázirlep, syn-qaterlerdiń aldyn alý tetikteri men algorıtmderin jasady.
Memlekettik keńesshiniń pikirinshe, balalardyń qaýipsizdigin qamtamasyz etýge jáne olardy zań talaptaryna qaıshy aqparattan qorǵaýǵa baǵyttalǵan jumystardy júıeli júrgizýdiń mańyzy zor. Atalǵan sharalardy júzege asyrýǵa azamattyq ınstıtýttardy jáne ata-analardy da tartqan jón.
Jıyn sońynda Erlan Qarın jaýapty memlekettik organdar arasyndaǵy baılanysty nyǵaıtý jóninde naqty tapsyrmalar berdi.
Osyǵan deıin Erlan Qarın memlekettik organdar ishki saıasat baǵytyndaǵy jumystary aıasynda áskerı-patrıottyq tárbıe berý boıynsha jekelegen is-sharalar uıymdastyrýdy qolǵa alǵanyna nazar aýdardy.
