Memlekettik keńesshi: Adam quqyqtary men bostandyqtary – jańa Konstıtýtsııanyń altyn arqaýy

ASTANA. KAZINFORM – Konstıtýtsııalyq reformalar jónindegi komıssııanyń kezekti otyrysynda Memlekettik keńesshi Erlan Qarın jańa Konstıtýtsııada halyqtyń ál-aýqatyn arttyrý memlekettik saıasattyń basty ólshemi bolatynyn atap ótti.

– Egemendik pen Táýelsizdikti qorǵaý. Memleket basshysy aıtqandaı, táýelsizdik bárinen qymbat. Biz endi egemendik pen táýelsizdikti eń joǵarǵy qundylyq retinde ǵana emes, kúndelikti qoldanatyn qaǵıda retinde bekitemiz. Adam quqyqtary men bostandyqtaryn saqtaý. Biz ázirlep jatqan Konstıtýtsııanyń jańa mátininde bul qaǵıdat mańyzdy oryn alady. Adam quqyqtary men bostandyqtary jańa redaktsııadaǵy Konstıtýtsııanyń altyn arqaýyna aınalyp otyr. Zań men tártiptiń ústemdigin qamtamasyz etý. Zań men tártip ústemdik etpeıinshe, qoǵam damymaıdy, sana ózgermeıdi. Bul – ádiletti qoǵamnyń basty sharty. Jalpyulttyq birlikti bekemdeý turaqty damýdyń kepili bolyp qala beredi. Ortaq maqsattar úshin tutas el bolyp jumylý – memlekettiligimizdiń myzǵymas qaǵıdasy, - dedi ol.

Erlan Qarın Konstıtýtsııada «Taza Qazaqstan» baǵdarlamasymen úndesetin saıasattyń basty ustyndary kórinis tapqanyn aıtady.

– Halyqtyń ál-aýqatyn arttyrý. Bul – memlekettik saıasattyń basty ólshemi. Jaýapty ári jasampaz otanshyldyq ıdeıasyn qalyptastyrý. Otanshyldyq – is-áreketimen el múddesi úshin jumys isteý. Al jasampazdyq – ony naqty istermen bekitý, syndarly dıalogpen dáleldeý. Qoǵamdyq dıalogty damytý. Bul – memleket pen qoǵam arasyndaǵy senim tiregi. Sońǵy jyldary júrgizgen reformalar, ótkizgen referendýmdar – damyǵan qoǵamdyq dıalogtyń jarqyn mysaly. Eńbek, progress, bilim qundylyqtaryn bekitý. Bul qundylyqtar keıingi jyldary memlekettik saıasattyń ajyramas bóligine aınaldy. Eńbek adamdaryna, bilimpazdarǵa memlekettik deńgeıde kórsetilip jatqan qurmet pen qoldaý – sonyń aıǵaǵy. Joǵary ekologııalyq mádenıet qalyptastyrý. Birneshe jyldan beri jemisti júzege asyrylyp kele jatqan «Taza Qazaqstan» jobasy halyqtyń tabıǵatqa, aınalaǵa degen sana-sezimin ózgertýde. Osy isti ári qaraı ilgeriletý mańyzdy, - dedi Memlekettik keńesshi.

Sondaı-aq ol tarıhı-mádenı murany saqtaý men tól mádenıetti qoldaý Konstıtýtsııalyq deńgeıde alǵash reti bekitilip otyrǵanyn eske saldy.

– Osylaısha Konstıtýtsııanyń 1-bólimi 3-babynda keltirilgen negizgi qaǵıdattardyń bári memleketimiz ustanyp otyrǵan saıasattyń baǵdaryn, kópshiliktiń talap-suranysynyń negizin quraıdy, - dedi Erlan Qarın.

Kazinform agenttiginiń saıtynda atalmysh otyrystan tikeleı efır uıymdastyryp otyr. 

 Aıta keteý kerek, jańa Konstıtýtsııanyń sońǵy nusqasynda 95 bap bolady.