Memlekettik keńesshi: 1995 jylǵy Konstıtýtsııadan óreskel qateler anyqtaldy

ASTANA. KAZINFORM – Memlekettik keńesshi Erlan Qarın qoldanystaǵy Konstıtýtsııanyń qazaqsha redaktsııasyndaǵy kalka uǵymdardy atady.

- 1995 jyly qabyldanǵan Konstıtýtsııada kezdesetin óreskel qateler, ártúrli quqyqtyq sheshimderge jeteleıtin termınder men tirkester anyqtaldy. Mysaly, qazirgi Konstıtýtsııada «Memlekettik Gımn» dep jazylǵan. Muny kópshilik «Memlekettik Ánuran» dep qoldanady. Komıssııa músheleri Konstıtýtsııa jobasyna «Memlekettik Ánuran» dep engizýdi usyndy. «Ánuran» – tilimizge ábden engen sóz ári maǵynany tolyq beredi.

Sol sekildi, «áskerılendirilgen quramalar qurýǵa» sózi «áskerılendirilgen jasaqtar qurýǵa» dep ózgertildi. «Qurama» sózi qazir múlde basqa maǵynada qoldanylady. «Jasaq» sózi normanyń mánin tolyq ashyp tur, - dedi ol.

Sondaı-aq, qoldanystaǵy Konstıtýtsııada «Saılaý taǵaıyndaıdy» degen sózdiń de zań tilindegi maǵynasyna nazar aýdarylǵanyn aıtty.

- Saılaý taǵaıyndalmaıdy, durysy – «saılaý ótkizý týraly sheshim qabyldanady». Osy jaǵdaı da eskerildi. 1995 jyly qabyldanǵan Ata zańda «azamattarǵa keshirim jasaýdy júzege asyrady» degen sóılem bar. Kalka aýdarma ekeni birden baıqalyp tur. Sondyqtan, ony «keshirim berý týraly sheshim qabyldaıdy» dep ózgertý usynyldy.

«Túbegeıli prıntsıpter» degen tirkes «Negiz quraýshy qaǵıdattar» dep alyndy. Mundaı mysaldar óte kóp. Bárin aıtyp shyǵý múmkin emes, - dedi Erlan Qarın.

Aıta keteıik, jańa Konstıtýtsııanyń jobasyn túrli mekemeler, ujymdar talqylap jatyr.