Memlekettik kásiporynǵa jumysqa qabyldaý men shyǵarýdyń jańa qaǵıdasy bekitildi
ASTANA. KAZINFORM — Ulttyq ekonomıka mınıstrligi memlekettik kásiporyn qyzmetkerlerin jumysqa qabyldaý, eńbek shartyn buzý, sondaı-aq kótermeleý men tártiptik jazalaý sharalaryn qoldanýdyń jańa qaǵıdasyn bekitkeni belgili boldy.
Vedomstvo atap ótkendeı, tıisti № 97 buıryq 2025 jylǵy 29 qyrkúıekte «Memlekettik múlik týraly» Zańnyń 139-baby, 7-tarmaǵyn iske asyrý maqsatynda qabyldandy.
Qujatty qabyldaý memlekettik sektordaǵy kadrlyq rásimderdiń ashyqtyǵyn, aıqyndyǵy men ádilettiligin arttyrýǵa baǵyttalǵan. Qazaqstanda alǵash ret memlekettik kásiporyndardaǵy bos laýazymdarǵa konkýrs ótkizýdiń biryńǵaı tártibi engizilip otyr. Endi árbir bos oryn naqty, biryńǵaı qaǵıdalarǵa sáıkes toltyrylady.
— Bekitilgen normalarǵa sáıkes, úmitker biliktilik talaptaryna saı kelgen jaǵdaıda, jumysqa qabyldaý jumys berýshiniń sheshimimen nemese konkýrs negizinde júzege asyrylady. Konkýrsty kásiporynnyń ózi ótkizedi. Ol birneshe kezeńnen turady: biliktilikti baǵalaý, áńgimelesý jáne konkýrstyq komıssııanyń sheshimi. Ashyqtyqty qamtamasyz etý maqsatynda konkýrs týraly habarlandyrýlar kásiporynnyń jáne ýákiletti organnyń ınternet-resýrstarynda qujattardy qabyldaý aıaqtalýdan keminde 15 kúntizbelik kún buryn ornalastyrylady. Úmitkerler ótinishpen birge bilim týraly, eńbek ótili týraly málimetterdi jáne sybaılas jemqorlyq qylmystary úshin sottylyǵynyń joqtyǵy týraly anyqtamany usynýy qajet, — dep túsindirdi mınıstrlik.
Konkýrstyq komıssııanyń sheshimi ashyq daýys berý arqyly qabyldanyp, hattama arqyly resimdeledi.
Sonymen qatar, qujatta kótermeleý men tártiptik jaza sharasyn qoldaný, sondaı-aq eńbek shartyn buzý Eńbek kodeksiniń erejelerine sáıkes retteledi.
Jańa Qaǵıdalardy iske asyrý kadrlyq úderisterdiń biryńǵaı standartyn qalyptastyryp, eńbek tártibin nyǵaıtýǵa jáne qyzmetkerlerge dem berý men jaýapkershilik júkteýdiń ádil júıesin engizýge múmkindik beredi.
Buıryq 2026 jylǵy 1 shildeden bastap kúshine enip, resmı jarııalanýy tıis.
Budan buryn Eńbekmıni elimizde 391 kásiporynda jalaqy qaryzy bar ekenin, eńbek ınspektsııasy 2,2 mlrd teńge bereshekti tirkegenin málim etti.