Memlekettik qaryzǵa qyzmet kórsetý shyǵyny ósti - Ulttyq bank
ASTANA. KAZINFORM – Memlekettik qaryzǵa túsetin júkteme nazar aýdaratyn negizgi máselelerdiń biri bolyp otyr. Bul týraly Ulttyq banktiń qarjy jáne naqty aktıvter naryǵyn taldaý basqarmasynyń basshysy Talǵat Jarqynbaı Ulttyq banktiń saraptamalyq-taldamalyq pikirtalas klýbynyń otyrysynda aıtty.
Onyń aıtýynsha, 2026 jyldyń birinshi jartyjyldyǵynyń sońyna qaraı memlekettik qaryzǵa qyzmet kórsetýge jumsalatyn shyǵystardyń úlesi 4%-dan 6%-ǵa deıin ósken.
- Qaryz alýshyǵa shaqqandaǵy ortasha bereshek halyqtyń nomınaldy tabysynyń ósý qarqynynan joǵary qarqynmen ósip keledi, – dedi Talǵat Jarqynbaı.
Sonymen qatar spıkerdiń aıtýynsha, 2025 jyldyń qorytyndysy boıynsha bıýdjet tapshylyǵy 2,5%-dy qurap, bul Memlekettik qarjyny basqarý tujyrymdamasynda belgilengen shekti mánder aıasynda qaldy.
Sonymen qatar JІÓ-ge shaqqandaǵy munaılyq emes tapshylyq 8%-dan 7%-ǵa deıin tómendegen.
Talǵat Jarqynbaıdyń aıtýynsha, 2025 jyly Ulttyq qor rekordtyq ınvestıtsııalyq tabys kórsetti. Onyń kólemi shamamen 10 mlrd AQSh dollaryna jetti.
- Alaıda bul rette fıskaldyq keńistiktiń tarylyp kele jatqanyn atap ótken jón, – dedi ol.
Onyń sózinshe, birinshiden, bıýdjet shyǵystary kiristerden joǵary qalyp otyr. Sonymen qatar qorlardyń ósimi JІÓ-niń nomınaldy ósý qarqynynan baıaý, al qaryzdyq qarjylandyrýǵa degen jalpy qajettilik artyp keledi.
- 2025 jyly qaryz alý qajettiligi 8 trln teńgeden asty. Al aldaǵy 2026 jáne 2027 jyldary buryn shyǵarylǵan memlekettik qaryzdar boıynsha óteý kólemi sharyqtaý shegine jetedi dep kútiledi. Bul bıýdjet turaqtylyǵynyń kútpegen kúızelisterge tózimdiligin tómendetýi múmkin, – dedi Talǵat Jarqynbaı.
Ulttyq bank ókiliniń aıtýynsha, 2025 jyly memlekettik baǵaly qaǵazdar naryǵy belsendiligin saqtaǵan. Memlekettik baǵaly qaǵazdar negizinen ulttyq valıýtada ornalastyryldy.
- Birinshi jartyjyldyqta negizgi suranys korporatıvtik satyp alýshylar men korporatıvtik ınvestorlar tarapynan boldy. Naryq qatysýshylary Salyq kodeksindegi ózgeristerge jáne retteýshilik talaptardyń ózgerýi jónindegi kútýlerge baılanysty birshama kútý ustanymynda boldy, – dedi ol.
Alaıda 2025 jyldyń ekinshi jartysynda naryqtaǵy suranys qaıta qalpyna kelgen. Bul rette suranys negizinen orta jáne uzaq merzimdi memlekettik baǵaly qaǵazdarǵa baǵyttaldy.
Sonymen qatar memlekettik baǵaly qaǵazdar naryǵyndaǵy ınvestorlar quramynyń keńeıip kele jatqany baıqalady.
- Máselen, memlekettik baǵaly qaǵazdardaǵy beırezıdentterdiń úlesi 4%-dan 6,5%-ǵa deıin ósti. Bul ósim negizinen qaıtalama naryqtaǵy operatsııalar esebinen qamtamasyz etildi, – dedi Talǵat Jarqynbaı.
Aıta keteıik, osy pikirtalasta turǵyn úı baǵasy bir jylda qalaı ózgergenin taldaǵan edi.
