Memlekettik qaryzdy basqarý jónindegi keńes quryldy
ASTANA. KAZINFORM — Bul sheshim Memlekettik qarjy salasynyń turaqtylyǵyn qamtamasyz etý men Qazaqstannyń 2025-2027 jyldarǵa arnalǵan makroekonomıkalyq saıasatynyń teńgerimin arttyrý jónindegi is-sharalar keshenin iske asyrý sheńberinde qabyldandy. Bul týraly Qarjy mınıstrligi habarlady.
Qarjy mınıstrligi, Ulttyq bank jáne Ulttyq ekonomıka mınıstrligimen birlesip konsýltatsııalyq-keńesshi organ Memlekettik qaryzdy basqarý jónindegi keńestiń qurylǵany týraly habarlaıdy.
Bul sheshim Memlekettik qarjy salasynyń turaqtylyǵyn qamtamasyz etý men Qazaqstannyń 2025-2027 jyldarǵa arnalǵan makroekonomıkalyq saıasatynyń teńgerimin arttyrý jónindegi is-sharalar keshenin iske asyrý sheńberinde qabyldandy.
— Keńestiń qyzmeti memlekettik baǵaly qaǵazdar naryǵynyń aýqymdylyǵyn, lıkvıdtigi men tıimdiligin arttyrýǵa, bıýdjet tapshylyǵynyń aldyn alý úshin memlekettik qaryz alý qunyn tómendetip, kvazımemlekettik sektor naryǵy men korporatıvti emıtentter úshin tıisti benchmarkterdi jolǵa qoıatyn sharalardy qalyptastyrýǵa baǵyttalǵan. Keńestiń negizgi mindetteri — makroekonomıkalyq jaǵdaılar men qaryz turaqtylyǵyn eskere otyryp, memlekettik qaryzdy basqarýǵa, memlekettik baǵaly qaǵazdar naryǵyn damytý men olardy ishki jáne syrtqy naryqtarǵa shyǵarý saıasatyn qalyptastyrýǵa kelisilgen ári ortaq tásilderdi ázirleýdi qamtıdy, — delingen Qarjy mınıstrligi habarlamasynda.
Memlekettik qaryzdy basqarý jónindegi keńesti qurý Qarjy mınıstrliginiń, Ulttyq banktiń jáne Ulttyq ekonomıka mınıstrliginiń fıskaldy jáne aqsha-nesıe saıasatyn tıimdi úılestirip, sondaı-aq baǵaly qaǵazdardyń ishki naryǵyn damytý jónindegi mindetterge basymdyq berilgenin aıǵaqtaıdy.
Memlekettik baǵaly qaǵazdardyń tıimdi jáne lıkvıdti naryǵyn damytý memlekettik qarjy júıesiniń ornyqtylyǵyn arttyrýdyń, tabys jaǵynan naryq baǵdaryn qalyptastyrýdyń jáne elimizdegi qor naryǵyn odan ári damytýdaǵy negizgi mańyzdy elementterdiń biri retinde qarastyrylyp otyr.
Aıta ketelik 2025 jyly álemdik ekonomıka qalaı ózgergeni týraly jazǵan edik.