Memlekettik qaryz deńgeıi tómen bolýy tıis dep sanaımyn – Oljas Bektenov

ASTANA. KAZINFORM – Qazaqstannyń memlekettik qaryz deńgeıi tómen. Bul týraly Senattyń jalpy otyrysynda Premer-mınıstr Oljas Bektenov aıtty.

- Shyndyǵynda búginde memlekettik qaryz deńgeıi jalpy ishki ónimniń 23,6 paıyzyn quraıdy. Jalpy tanylǵan halyqaralyq ádistemege sáıkes, memlekettik qaryzdyń mundaı deńgeıi tómen dep moıyndalady. Eger, mysal úshin alar bolsaq, kóptegen damyǵan eldiń memlekettik qaryz deńgeıi 50, 80 paıyzdan asady. Memlekettik qaryz deńgeıi jalpy ishki ónimnen 100 paıyzdan da asatyn jekelegen damyǵan elder bar. Árıne, mundaı tájirıbeni qoldanýǵa múldem shaqyryp otyrǵanym joq. Kerisinshe, Qazaqstannyń memlekettik qaryz deńgeıi tómen bolýy tıis dep sanaımyn jáne Úkimet osy baǵytta jumys istep jatyr, - dedi Úkimet basshys senatorlardyń saýalyna oraı.

Onyń atap ótýinshe, búginde elimizdiń memlekettik qaryz deńgeıiniń barynsha qolaıly ekenin halyqaralyq qarjy uıymdarynyń baǵalaýy da dáleldep otyr. Fitch, Moody's, S&P syndy reıtıng agenttikteriniń de joǵary baǵalaýyna ıe.

- Bul óz kezeginde barynsha tıimdi sharttarmen syrtqy qaryz tartýǵa múmkindik beredi. Máselen, qazan aıynyń sońynda 4,4 paıyzben eýrobondtar ornalastyrdyq. Bul halyqaralyq ınvestorlardyń Qazaqstanǵa senetindigin, osyndaı paıyzben aqsha quıatyndyǵynyń jaqsy kórsetkishi, aqshanyń tartymdy kórsetkishi, - dedi Oljas Bektenov.

Aıta keteıik, búgin Senattyń jalpy otyrysynda Premer-mınıstrdiń orynbasary — Ulttyq ekonomıka mınıstri Serik Jumanǵarın elimizdiń 2026-2028 jyldarǵa arnalǵan áleýmettik-ekonomıkalyq damý boljamyn tanystyrdy.