Memlekettik qala qurylysy kadastrynyń avtomattandyrylǵan aqparattyq júıesi engiziledi
ASTANA. KAZINFORM — Memlekettik qala qurylysy kadastrynyń avtomattandyrylǵan aqparattyq júıesi engiziledi. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev aıtty.
- Qala qurylysy qujattaryn qabyldaý protsesterin ortalyqtandyrý maqsatynda Memlekettik qala qurylysy kadastrynyń avtomattandyrylǵan aqparattyq júıesin engizý kózdelip otyr. Ol talaptarǵa sáıkes kelmeıtin qujattardy berý múmkindigin shekteıdi. Qazirde qala qurylysy kadastrynyń tsıfrlyq bazasy elimiz boıynsha barlyq 89 qalanyń jobalaryn jáne ınjenerlik jelilerdiń 94 paıyzyn qamtıdy. Sondaı-aq oǵan jalpy aýmaǵy 824 myń gektar bolatyn jerlerdiń tsıfrlyq topografııalyq derekteri engizilgen. Pılottyq joba aıasynda atalǵan tsıfrlyq júıe arqyly ákimdikter bastapqy ruqsat qujattaryn berý, eskız jobalardy kelisý jáne tehnıkalyq sharttardy berý sııaqty 146 myńnan astam memlekettik qyzmet kórsetti, - dedi mınıstr.
Alaıda onyń aıtýynsha, ruqsat berý protsesin sapaly avtomattandyrý úshin ákimdikterge qalalyq josparlaý qujattaryn jańartýdy jedeldetý qajet.
- Qazirgi ýaqytta osy baǵytta jumys qarqyny eń tómen óńirler qataryna Mańǵystaý, Batys Qazaqstan, Qyzylorda, Soltústik Qazaqstan oblystary jáne Abaı oblysy kiredi, - dedi Ersaıyn Naǵaspaev.
Aıta keteıik, 2026 jyldyń 1 shildesinde jańa Qurylys kodeksi kúshine enedi. Onyń aıasynda 138 normatıvtik-quqyqtyq akti ózektendiriledi.
