Grant máseleni sheshýge nemese qoǵamdyq uıymdy «qol balaǵa» aınaldyrýǵa da jumsalýy múmkin

— Fılosofııada sannyń sapaǵa ótý zańdylyǵy degen bar. 80-jyldardyń sońynda, uzaq úzilisten keıin keńes júıesinde qoǵamdyq uıymdar qurýǵa ruqsat berilgende olar qaýlap ósti. Mysaly, ózim «Ulytaý» qozǵalysyna basshylyq jasadym. Batysta «Jem», «Naryn» qozǵalysy, Semeıde, Qaraǵandyda, jalpy jer-jerde osyndaı qozǵalystar jumys istedi. Al jalpyulttyq 3 qozǵalys boldy. Ol mádenıette — «Qazaq tili» qoǵamy, ekologııada — «Nevada-Semeı» qozǵalysy, saıasatta — «Azat» qozǵalysy. Osylardyń shoqtyǵy eń bıik. Sebebi úsheýi de jalpyulttyq sıpat aldy. Degenmen shaǵyn júzdegen aımaqtyq qozǵalystar, uıymdar paıda boldy. Ol ýaqytta memleket múmkindigi basqa edi. Sondyqtan olar memlekettik grantqa júgingen joq. Biraq, ózderi másele kóterip, sony sheshýge májbúrleı aldy, — dedi ol.

Komıtet tóraǵasynyń aıtýynsha, «Ulytaý» qozǵalysy qazirgi Ulytaý oblysynda Baıqońyrdy zymyran synaqtaryn jınaýǵa májbúrledi. Radıolokatsııalyq stansalardy eldi mekenderde shalǵaıǵa kóshirýge yqpal etti.

— Keıin memleket múmkindigi ulǵaıǵannan soń granttar bóle bastady. Bul jerde tepe-teńdiktiń saqtalǵany jón. Grantty máseleni sheshýge ne bolmasa qoǵamdyq uıymdy qol balaǵa aınaldyrýǵa jumsaýǵa bolady. Osy rette qoǵamdyq uıym óziniń bastapqy maqsatyn umytpaýy tıis. Ol ózekti máseleni sheshý úshin, sheshe almasa qoǵamdy jumyldyryp, bılikti májbúrleý, jol kórsetý úshin qurylady. Osydan onshaqty jyl buryn Azamattyq alıanstyń jınalysyna qatysqanymda basym kópshiligi granttar máselesin kóteredi. Al ózderiniń ekologııalyq, mádenı jáne basqa suraqtaryn eshqaısysy kótergen joq. Sonda, «Qudaıǵa shúkir qazir memleketimizdiń jańa múmkindikteri bar» dep oıladym. Biraq, ol múmkindik ótkir ustara sekildi. Durys paıdalanbasa, ony biren-saran laýazym ıesiniń múddesine paıdalansa, onda azamattyq belsendilik óziniń rólin atqarmaǵany, — dedi Álıhan Baımenov.

Osyǵan deıin Baımenov Táýelsizdik alǵannan keıingi romantıka alǵashqy jyldardaǵy qıyndyqtardy eńserýge kómekteskenin alǵa tartty.