Memlekettik grant tizimine ilige almaǵan talapkerlerge taǵy qandaı múmkindik bar
ASTANA. KAZINFORM — Memlekettik bilim berý grantyna óte almaǵan talapkerler ákimdikterdiń, «Qazaqstan halqyna» qoǵamdyq qorynyń, joǵary oqý oryndarynyń jáne birqatar kompanııalardyń bilim granttaryna úmitker bola alady. Bul týraly QR Ǵylym jáne joǵary bilim mınıstrligi Joǵary jáne joǵary oqý ornynan keıingi bilim berý komıteti basqarmasynyń basshysy Jandáýlet Qudaıbergenov Jibek Joly telearnasynyń «Búgin Live» baǵdarlamasynda aıtty.
Onyń sózinshe, respýblıkalyq bıýdjet esebinen bólinetin memlekettik bilim granttaryna konkýrs 20 shildege deıin jalǵasady. Al onyń qorytyndysy 10 tamyzǵa deıin jarııalanady.
— Memlekettik granttan bólek talapkerler úshin basqa da múmkindikter qarastyrylǵan. Sonyń biri — jergilikti ákimdikter bóletin granttar. Bul ókilettik ákimdikterge 2019 jyly berildi. Sodan beri jergilikti bıýdjet esebinen jyl saıyn shamamen 2,5–3 myń bilim granty bólinip keledi, — dedi Jandáýlet Qudaıbergenov.
Onyń aıtýyna qaraǵanda, talapkerler «Qazaqstan halqyna» qoǵamdyq qorynyń bilim granttaryna da úmitker bola alady. Bul granttar negizinen UBT-dan joǵary ball jınaǵanymen, memlekettik grant ıegeri atanbaǵan áleýmettik osal toptaǵy talapkerlerge beriledi.
Budan bólek, túrli uıymdar men iri kompanııalar da óz qarajaty esebinen bilim granttaryn bóledi.
— Byltyr Freedom Bank óz qarajaty esebinen bilim granttaryn bóldi. Budan bólek, «Qazatomónerkásip» te talapkerlerge arnalǵan óz granttaryn usyndy. Al doktorantýra deńgeıinde «Qazaqmys» kompanııasymen birlesip kadr daıarlaý jumystary júrgizilip jatyr, — dedi komıtet basqarmasynyń basshysy.
Onyń aıtýynsha, memlekettik granttar konkýrsynyń qorytyndysy shyqqannan keıin mınıstrlik talapkerlerge arnalǵan balama granttardyń arnaıy tizimin jarııalaıdy.
— Memlekettik granttan bólek qaıda oqýǵa túsýge bolatyny jónindegi arnaıy tizim mindetti túrde jarııalanady. Oǵan ákimdikterdiń, qoǵamdyq qorlardyń, joǵary oqý oryndarynyń jáne túrli uıymdardyń granttary engiziledi. Bul tizimdi bıyl da jarııalaımyz, — dedi Jandáýlet Qudaıbergenov.
Komıtet basqarmasynyń basshysy ár granttyń óz talaptary bar ekenin aıtty. Sondyqtan memlekettik grantqa óte almaǵan talapkerler talaptarǵa saı kelgen jaǵdaıda ózge baǵdarlamalar arqyly da tegin bilim alý múmkindigine ıe bola alady.
Eske salaıyq, bıylǵy negizgi UBT 10 mamyr men 10 shilde aralyǵynda ótti. Testileýge 233 myń talapker qatysyp, eki múmkindigin qosa eseptegende test 422 myń ret tapsyryldy.
