Memlekettik grant boıynsha oqyǵan pedagogterdiń 90 paıyzy jumyssyz qalǵan — aýdıt

ASTANA. KAZINFORM — Májilis depýtaty Nurgúl Taý Ǵylym jáne joǵary bilim mınıstri Saıasat Nurbekten memlekettik grant boıynsha bilim alǵan pedagogterdiń 90 paıyzy nege jumysqa ornalaspaı jatqanyn surady.

Depýtattyń aıtýynsha, mundaı málimet Joǵary aýdıtorlyq palatanyń qorytyndysynda kórsetilgen.

— Aýdıt derekteri boıynsha, pedagogterdi daıarlaýǵa memlekettik tapsyrys jyldar boıy naqty qajettilikti esepke almaı qalyptastyrylǵan. Mysaly, 2022 jyly qajettilik 7,5 ese, 22023 jyly 9,3 ese artqan. Úsh jyl ishinde buǵan bıýdjetti 31,8 mlrd teńge nemese 13,905 qosymsha granttyń artyq shyǵynyna ushyratqan. Memlekettik tapsyrys boıynsha oqyǵan túlekterdiń 90 paıyzy jumysqa ornalaspaǵan, — dedi depýtat.

Saıasat Nurbek shyn máninde memlekettik grant boıynsha oqyǵan túlekterdiń 35 myńy jumyssyz qalǵanyn aıtty.

— Dál solaı, 90 paıyzy jumyspen qamtamasyz etilmedi degen aqparat berildi. Onyń ishinde 35 myńy jumyssyz jáne 60 myń túlek týraly aqparat berilmegen degen aqparat boldy. 60 myń túlektiń deregin tolyqqandy berýge daıynbyz. Olar jumysqa ornalastyryldy. 2022-23 jyldan bastap memlekettik tapsyrys tolyqqandy Eńbek jáne halyqty áleýmettik qorǵaý mınıstrliginiń demografııalyq derekterimen sáıkestendirildi, — dedi mınıstr.

Bul máselege Májilis tóraǵasy Erlan Qoshanov ta aralasyp, mınıstrge bıýdjet aqshasyn jumsalatyn sharýǵa yqtııatpen qaraý kerektigin eskertti.

Jalpy Qazaqstanda 8 myńǵa jýyq orta bilim berý uıymynda 400 myńǵa jýyq pedagog jumys isteıdi.