«Memlekettik grant alýǵa kómektesem»: Almaty oblysynda 5 mln teńge jymqyrǵan áıel ustaldy

QONAEV. KAZINFORM - Almaty oblysynda memlekettik grant alýǵa kómek kórsetemin degen syltaýmen azamattardy WhatsApp messendjeri arqyly aldap kelgen áıeldiń zańsyz áreketi áshkerelendi.

Oblystyq polıtsııa málimetinshe, jedel-izdestirý sharalary barysynda Eńbekshiqazaq aýdanynda jergilikti turǵyn ustaldy. Tergeý barysynda kúdikti adamdardy aldap, 5 mıllıon teńgeden astam qarajatty ıemdengeni anyqtaldy.

— Qazirgi tańda sotqa deıingi tergeý aıasynda onyń zańsyz áreketteriniń 10-nan astam epızody tirkeldi. Atalǵan fakti boıynsha alaıaqtyq babymen qylmystyq is qozǵalyp, tergeý amaldary júrgizilip jatyr. Kúdikti barlyq qajetti tergeý sharalaryn júrgizý úshin polıtsııa bólimshesine jetkizildi, — dep habarlady departamentten.

Eske salaıyq, alaıaqtar endi medıtsına mekemeleriniń atyn jamylyp áreket ete bastaǵanyn jazǵanbyz.